૨૭. ગોતમબુદ્ધવંસો

૧. અહમેતરહિ સમ્બુદ્ધો [બુદ્ધો (સી.)], ગોતમો સક્યવડ્ઢનો;

પધાનં પદહિત્વાન, પત્તો સમ્બોધિમુત્તમં.

૨. બ્રહ્મુના યાચિતો સન્તો, ધમ્મચક્કં પવત્તયિં;

અટ્ઠારસન્નં કોટીનં, પઠમાભિસમયો અહુ.

૩. તતો પરઞ્ચ દેસેન્તે, નરદેવસમાગમે;

ગણનાય ન વત્તબ્બો, દુતિયાભિસમયો અહુ.

૪. ઇધેવાહં એતરહિ, ઓવદિં મમ અત્રજં;

ગણનાય ન વત્તબ્બો, તતિયાભિસમયો અહુ.

૫. એકોસિ સન્નિપાતો મે, સાવકાનં મહેસિનં;

અડ્ઢતેળસસતાનં, ભિક્ખૂનાસિ સમાગમો.

૬. વિરોચમાનો વિમલો, ભિક્ખુસઙ્ઘસ્સ મજ્ઝગો;

દદામિ પત્થિતં સબ્બં, મણીવ સબ્બકામદો.

૭. ફલમાકઙ્ખમાનાનં, ભવચ્છન્દજહેસિનં;

ચતુસચ્ચં પકાસેમિ, અનુકમ્પાય પાણિનં.

૮. દસવીસસહસ્સાનં, ધમ્માભિસમયો અહુ;

એકદ્વિન્નં અભિસમયો, ગણનાતો અસઙ્ખિયો.

૯. વિત્થારિકં બાહુજઞ્ઞં, ઇદ્ધં ફીતં સુફુલ્લિતં;

ઇધ મય્હં સક્યમુનિનો, સાસનં સુવિસોધિતં.

૧૦. અનાસવા વીતરાગા, સન્તચિત્તા સમાહિતા;

ભિક્ખૂનેકસતા સબ્બે, પરિવારેન્તિ મં સદા.

૧૧. ઇદાનિ યે એતરહિ, જહન્તિ માનુસં ભવં;

અપ્પત્તમાનસા સેખા, તે ભિક્ખૂ વિઞ્ઞુગરહિતા.

૧૨. અરિયઞ્ચ સંથોમયન્તા, સદા ધમ્મરતા જના;

બુજ્ઝિસ્સન્તિ સતિમન્તો, સંસારસરિતં ગતા.

૧૩. નગરં કપિલવત્થુ મે, રાજા સુદ્ધોદનો પિતા;

મય્હં જનેત્તિકા માતા, માયાદેવીતિ વુચ્ચતિ.

૧૪. એકૂનતિંસવસ્સાનિ, અગારં અજ્ઝહં વસિં;

રમ્મો સુરમ્મો સુભકો, તયો પાસાદમુત્તમા.

૧૫. ચત્તારીસસહસ્સાનિ, નારિયો સમલઙ્કતા;

ભદ્દકઞ્ચના નામ નારી, રાહુલો નામ અત્રજો.

૧૬. નિમિત્તે ચતુરો દિસ્વા, અસ્સયાનેન નિક્ખમિં;

છબ્બસ્સં પધાનચારં, અચરિં દુક્કરં અહં.

૧૭. બારાણસિયં ઇસિપતને, ચક્કં પવત્તિતં મયા;

અહં ગોતમસમ્બુદ્ધો, સરણં સબ્બપાણિનં.

૧૮. કોલિતો ઉપતિસ્સો ચ, દ્વે ભિક્ખૂ અગ્ગસાવકા;

આનન્દો નામુપટ્ઠાકો, સન્તિકાવચરો મમ;

ખેમા ઉપ્પલવણ્ણા ચ, ભિક્ખુની અગ્ગસાવિકા.

૧૯. ચિત્તો હત્થાળવકો ચ, અગ્ગુપટ્ઠાકુપાસકા;

નન્દમાતા ચ ઉત્તરા, અગ્ગુપટ્ઠિકુપાસિકા.

૨૦. અહં અસ્સત્થમૂલમ્હિ, પત્તો સમ્બોધિમુત્તમં;

બ્યામપ્પભા સદા મય્હં, સોળસહત્થમુગ્ગતા.

૨૧. અપ્પં વસ્સસતં આયુ, ઇદાનેતરહિ વિજ્જતિ;

તાવતા તિટ્ઠમાનોહં, તારેમિ જનતં બહું.

૨૨. ઠપયિત્વાન ધમ્મુક્કં, પચ્છિમં જનબોધનં;

અહમ્પિ નચિરસ્સેવ, સદ્ધિં સાવકસઙ્ઘતો;

ઇધેવ પરિનિબ્બિસ્સં, અગ્ગી વાહારસઙ્ખયા.

૨૩. તાનિ ચ અતુલતેજાનિ, ઇમાનિ ચ દસબલાનિ [યસબલાનિ (અટ્ઠ.)];

અયઞ્ચ ગુણધારણો દેહો, દ્વત્તિંસવરલક્ખણવિચિત્તો.

૨૪. દસ દિસા પભાસેત્વા, સતરંસીવ છપ્પભા;

સબ્બં તમન્તરહિસ્સન્તિ, નનુ રિત્તા સબ્બસઙ્ખારાતિ.

ગોતમસ્સ ભગવતો વંસો પઞ્ચવીસતિમો.