૨૬. કસ્સપબુદ્ધવંસો

૧. કોણાગમનસ્સ અપરેન, સમ્બુદ્ધો દ્વિપદુત્તમો;

કસ્સપો નામ ગોત્તેન, ધમ્મરાજા પભઙ્કરો.

૨. સઞ્છડ્ડિતં કુલમૂલં, બહ્વન્નપાનભોજનં;

દત્વાન યાચકે દાનં, પૂરયિત્વાન માનસં;

ઉસભોવ આળકં ભેત્વા, પત્તો સમ્બોધિમુત્તમં.

૩. ધમ્મચક્કં પવત્તેન્તે, કસ્સપે લોકનાયકે;

વીસકોટિસહસ્સાનં, પઠમાભિસમયો અહુ.

૪. ચતુમાસં યદા બુદ્ધો, લોકે ચરતિ ચારિકં;

દસકોટિસહસ્સાનં, દુતિયાભિસમયો અહુ.

૫. યમકં વિકુબ્બનં કત્વા, ઞાણધાતું પકિત્તયિ;

પઞ્ચકોટિસહસ્સાનં, તતિયાભિસમયો અહુ.

૬. સુધમ્મા દેવપુરે રમ્મે, તત્થ ધમ્મં પકિત્તયિ;

તીણિકોટિસહસ્સાનં, દેવાનં બોધયી જિનો.

૭. નરદેવસ્સ યક્ખસ્સ, અપરે ધમ્મદેસને;

એતેસાનં અભિસમયા, ગણનાતો અસઙ્ખિયા.

૮. તસ્સાપિ દેવદેવસ્સ, એકો આસિ સમાગમો;

ખીણાસવાનં વિમલાનં, સન્તચિત્તાન તાદિનં.

૯. વીસભિક્ખુસહસ્સાનં, તદા આસિ સમાગમો;

અતિક્કન્તભવન્તાનં, હિરિસીલેન તાદિનં.

૧૦. અહં તદા માણવકો, જોતિપાલોતિ વિસ્સુતો;

અજ્ઝાયકો મન્તધરો, તિણ્ણં વેદાન પારગૂ.

૧૧. લક્ખણે ઇતિહાસે ચ, સધમ્મે પારમિં ગતો;

ભૂમન્તલિક્ખકુસલો, કતવિજ્જો અનાવયો.

૧૨. કસ્સપસ્સ ભગવતો, ઘટિકારો નામુપટ્ઠાકો;

સગારવો સપ્પતિસ્સો, નિબ્બુતો તતિયે ફલે.

૧૩. આદાય મં ઘટીકારો, ઉપગઞ્છિ કસ્સપં જિનં;

તસ્સ ધમ્મં સુણિત્વાન, પબ્બજિં તસ્સ સન્તિકે.

૧૪. આરદ્ધવીરિયો હુત્વા, વત્તાવત્તેસુ કોવિદો;

ન ક્વચિ પરિહાયામિ, પૂરેસિં જિનસાસનં.

૧૫. યાવતા બુદ્ધભણિતં, નવઙ્ગં જિનસાસનં;

સબ્બં પરિયાપુણિત્વાન, સોભયિં જિનસાસનં.

૧૬. મમ અચ્છરિયં દિસ્વા, સોપિ બુદ્ધો વિયાકરિ;

‘‘ઇમમ્હિ ભદ્દકે કપ્પે, અયં બુદ્ધો ભવિસ્સતિ.

૧૭. ‘‘અહુ કપિલવ્હયા રમ્મા, નિક્ખમિત્વા તથાગતો;

પધાનં પદહિત્વાન, કત્વા દુક્કરકારિકં.

૧૮. ‘‘અજપાલરુક્ખમૂલે, નિસીદિત્વા તથાગતો;

તત્થ પાયાસં પગ્ગય્હ, નેરઞ્જરમુપેહિતિ.

૧૯. ‘‘નેરઞ્જરાય તીરમ્હિ, પાયાસં પરિભુઞ્જિય;

પટિયત્તવરમગ્ગેન, બોધિમૂલમુપેહિતિ.

૨૦. ‘‘તતો પદક્ખિણં કત્વા, બોધિમણ્ડં અનુત્તરો;

અપરાજિતટ્ઠાનમ્હિ [અપરાજિતનિસભટ્ઠાને (ક.)], બોધિપલ્લઙ્કમુત્તમે;

પલ્લઙ્કેન નિસીદિત્વા, બુજ્ઝિસ્સતિ મહાયસો.

૨૧. ‘‘ઇમસ્સ જનિકા માતા, માયા નામ ભવિસ્સતિ;

પિતા સુદ્ધોદનો નામ, અયં હેસ્સતિ ગોતમો.

૨૨. ‘‘અનાસવા વીતરાગા, સન્તચિત્તા સમાહિતા;

કોલિતો ઉપતિસ્સો ચ, અગ્ગા હેસ્સન્તિ સાવકા;

આનન્દો નામુપટ્ઠાકો, ઉપટ્ઠિસ્સતિમં જિનં.

૨૩. ‘‘ખેમા ઉપ્પલવણ્ણા ચ, અગ્ગા હેસ્સન્તિ સાવિકા;

અનાસવા સન્તચિત્તા, વીતરાગા સમાહિતા;

બોધિ તસ્સ ભગવતો, અસ્સત્થોતિ પવુચ્ચતિ.

૨૪. ‘‘ચિત્તો હત્થાળવકો ચ, અગ્ગા હેસ્સન્તુપટ્ઠકા;

નન્દમાતા ચ ઉત્તરા, અગ્ગા હેસ્સન્તુપટ્ઠિકા’’.

૨૫. ઇદં સુત્વાન વચનં, અસ્સમસ્સ મહેસિનો;

આમોદિતા નરમરૂ, બુદ્ધબીજં કિર અયં.

૨૬. ઉક્કુટ્ઠિસદ્દા પવત્તન્તિ, અપ્ફોટેન્તિ હસન્તિ ચ;

કતઞ્જલી નમસ્સન્તિ, દસસહસ્સી સદેવકા.

૨૭. ‘‘યદિમસ્સ લોકનાથસ્સ, વિરજ્ઝિસ્સામ સાસનં;

અનાગતમ્હિ અદ્ધાને, હેસ્સામ સમ્મુખા ઇમં.

૨૮. ‘‘યથા મનુસ્સા નદિં તરન્તા, પટિતિત્થં વિરજ્ઝિય;

હેટ્ઠા તિત્થે ગહેત્વાન, ઉત્તરન્તિ મહાનદિં.

૨૯. ‘‘એવમેવ મયં સબ્બે, યદિ મુઞ્ચામિમં જિનં;

અનાગતમ્હિ અદ્ધાને, હેસ્સામ સમ્મુખા ઇમં’’.

૩૦. તસ્સાપિ વચનં સુત્વા, ભિય્યો ચિત્તં પસાદયિં;

ઉત્તરિં વતમધિટ્ઠાસિં, દસપારમિપૂરિયા.

૩૧. એવમહં સંસરિત્વા, પરિવજ્જેન્તો અનાચરં;

દુક્કરઞ્ચ કતં મય્હં, બોધિયાયેવ કારણા.

૩૨. નગરં બારાણસી નામ, કિકી નામાસિ ખત્તિયો;

વસતે તત્થ નગરે, સમ્બુદ્ધસ્સ મહાકુલં.

૩૩. બ્રાહ્મણો બ્રહ્મદત્તોવ, આસિ બુદ્ધસ્સ સો પિતા;

ધનવતી નામ જનિકા, કસ્સપસ્સ મહેસિનો.

૩૪. દુવે વસ્સસહસ્સાનિ, અગારં અજ્ઝ સો વસિ;

હંસો યસો સિરિનન્દો, તયો પાસાદમુત્તમા.

૩૫. તિસોળસસહસ્સાનિ, નારિયો સમલઙ્કતા;

સુનન્દા નામ સા નારી, વિજિતસેનો નામ અત્રજો.

૩૬. નિમિત્તે ચતુરો દિસ્વા, પાસાદેનાભિનિક્ખમિ;

સત્તાહં પધાનચારં, અચરી પુરિસુત્તમો.

૩૭. બ્રહ્મુના યાચિતો સન્તો, કસ્સપો લોકનાયકો;

વત્તિ ચક્કં મહાવીરો, મિગદાયે નરુત્તમો.

૩૮. તિસ્સો ચ ભારદ્વાજો ચ, અહેસું અગ્ગસાવકા;

સબ્બમિત્તો નામુપટ્ઠાકો, કસ્સપસ્સ મહેસિનો.

૩૯. અનુળા ઉરુવેળા ચ, અહેસું અગ્ગસાવિકા;

બોધિ તસ્સ ભગવતો, નિગ્રોધોતિ પવુચ્ચતિ.

૪૦. સુમઙ્ગલો ઘટિકારો ચ, અહેસું અગ્ગુપટ્ઠકા;

વિચિતસેના ભદ્દા [ભદ્રા (ક.)] ચ, અહેસું અગ્ગુપટ્ઠિકા.

૪૧. ઉચ્ચત્તનેન સો બુદ્ધો, વીસતિરતનુગ્ગતો;

વિજ્જુલટ્ઠીવ આકાસે, ચન્દોવ ગહપૂરિતો.

૪૨. વીસતિવસ્સસહસ્સાનિ, આયુ તસ્સ મહેસિનો;

તાવતા તિટ્ઠમાનો સો, તારેસિ જનતં બહું.

૪૩. ધમ્મતળાકં માપયિત્વા, સીલં દત્વા વિલેપનં;

ધમ્મદુસ્સં નિવાસેત્વા, ધમ્મમાલં વિભજ્જિય.

૪૪. ધમ્મવિમલમાદાસં, ઠપયિત્વા મહાજને;

કેચિ નિબ્બાનં પત્થેન્તા, પસ્સન્તુ મે અલઙ્કરં.

૪૫. સીલકઞ્ચુકં દત્વાન, ઝાનકવચવમ્મિતં;

ધમ્મચમ્મં પારુપિત્વા, દત્વા સન્નાહમુત્તમં.

૪૬. સતિફલકં દત્વાન, તિખિણઞાણકુન્તિમં;

ધમ્મખગ્ગવરં દત્વા, સીલસંસગ્ગમદ્દનં.

૪૭. તેવિજ્જાભૂસનં દત્વાન, આવેળં ચતુરો ફલે;

છળભિઞ્ઞાભરણં દત્વા, ધમ્મપુપ્ફપિળન્ધનં.

૪૮. સદ્ધમ્મપણ્ડરચ્છત્તં, દત્વા પાપનિવારણં;

માપયિત્વાભયં પુપ્ફં, નિબ્બુતો સો સસાવકો.

૪૯. એસો હિ સમ્માસમ્બુદ્ધો, અપ્પમેય્યો દુરાસદો;

એસો હિ ધમ્મરતનો, સ્વાક્ખાતો એહિપસ્સિકો.

૫૦. એસો હિ સઙ્ઘરતનો, સુપ્પટિપન્નો અનુત્તરો;

સબ્બં તમન્તરહિતં, નનુ રિત્તા સબ્બસઙ્ખારા.

૫૧. મહાકસ્સપો જિનો સત્થા, સેતબ્યારામમ્હિ નિબ્બુતો;

તત્થેવસ્સ જિનથૂપો, યોજનુબ્બેધમુગ્ગતોતિ.

કસ્સપસ્સ ભગવતો વંસો ચતુવીસતિમો.