૨૫. કોણાગમનબુદ્ધવંસો

૧. કકુસન્ધસ્સ અપરેન, સમ્બુદ્ધો દ્વિપદુત્તમો;

કોણાગમનો નામ જિનો, લોકજેટ્ઠો નરાસભો.

૨. દસધમ્મે પૂરયિત્વાન, કન્તારં સમતિક્કમિ;

પવાહિય મલં સબ્બં, પત્તો સમ્બોધિમુત્તમં.

૩. ધમ્મચક્કં પવત્તેન્તે, કોણાગમનનાયકે;

તિંસકોટિસહસ્સાનં, પઠમાભિસમયો અહુ.

૪. પાટિહીરં કરોન્તે ચ, પરવાદપ્પમદ્દને;

વીસતિકોટિસહસ્સાનં, દુતિયાભિસમયો અહુ.

૫. તતો વિકુબ્બનં કત્વા, જિનો દેવપુરં ગતો;

વસતે તત્થ સમ્બુદ્ધો, સિલાય પણ્ડુકમ્બલે.

૬. પકરણે સત્ત દેસેન્તો, વસ્સં વસતિ સો મુનિ;

દસકોટિસહસ્સાનં, તતિયાભિસમયો અહુ.

૭. તસ્સાપિ દેવદેવસ્સ, એકો આસિ સમાગમો;

ખીણાસવાનં વિમલાનં, સન્તચિત્તાન તાદિનં.

૮. તિંસભિક્ખુસહસ્સાનં, તદા આસિ સમાગમો;

ઓઘાનમતિક્કન્તાનં, ભિજ્જિતાનઞ્ચ મચ્ચુયા.

૯. અહં તેન સમયેન, પબ્બતો નામ ખત્તિયો;

મિત્તામચ્ચેહિ સમ્પન્નો, અનન્તબલવાહનો.

૧૦. સમ્બુદ્ધદસ્સનં ગન્ત્વા, સુત્વા ધમ્મમનુત્તરં;

નિમન્તેત્વા સજિનસઙ્ઘં, દાનં દત્વા યદિચ્છકં.

૧૧. પટ્ટુણ્ણં ચીનપટ્ટઞ્ચ, કોસેય્યં કમ્બલમ્પિ ચ;

સોવણ્ણપાદુકઞ્ચેવ, અદાસિં સત્થુસાવકે.

૧૨. સોપિ મં બુદ્ધો બ્યાકાસિ, સઙ્ઘમજ્ઝે નિસીદિય;

‘‘ઇમમ્હિ ભદ્દકે કપ્પે, અયં બુદ્ધો ભવિસ્સતિ.

૧૩. ‘‘અહુ કપિલવ્હયા રમ્મા…પે… હેસ્સામ સમ્મુખા ઇમં’’.

૧૪. તસ્સાપિ વચનં સુત્વા, ભિય્યો ચિત્તં પસાદયિં;

ઉત્તરિં વતમધિટ્ઠાસિં, દસપારમિપૂરિયા.

૧૫. સબ્બઞ્ઞુતં ગવેસન્તો, દાનં દત્વા નરુત્તમે;

ઓહાયાહં મહારજ્જં, પબ્બજિં જિનસન્તિકે [તસ્સ સન્તિકે (સી.)].

૧૬. નગરં સોભવતી નામ, સોભો નામાસિ ખત્તિયો;

વસતે તત્થ નગરે, સમ્બુદ્ધસ્સ મહાકુલં.

૧૭. બ્રાહ્મણો યઞ્ઞદત્તો ચ, આસિ બુદ્ધસ્સ સો પિતા;

ઉત્તરા નામ જનિકા, કોણાગમનસ્સ સત્થુનો.

૧૮. તીણિ વસ્સસહસ્સાનિ, અગારં અજ્ઝ સો વસિ;

તુસિતસન્તુસિતસન્તુટ્ઠા, તયો પાસાદમુત્તમા.

૧૯. અનૂનસોળસસહસ્સાનિ, નારિયો સમલઙ્કતા;

રુચિગત્તા નામ નારી, સત્થવાહો નામ અત્રજો.

૨૦. નિમિત્તે ચતુરો દિસ્વા, હત્થિયાનેન નિક્ખમિ;

છમાસં પધાનચારં, અચરી પુરિસુત્તમો.

૨૧. બ્રહ્મુના યાચિતો સન્તો, કોણાગમનનાયકો;

વત્તિ ચક્કં મહાવીરો, મિગદાયે નરુત્તમો.

૨૨. ભિય્યસો ઉત્તરો નામ, અહેસું અગ્ગસાવકા;

સોત્થિજો નામુપટ્ઠાકો, કોણાગમનસ્સ સત્થુનો.

૨૩. સમુદ્દા ઉત્તરા ચેવ, અહેસું અગ્ગસાવિકા;

બોધિ તસ્સ ભગવતો, ઉદુમ્બરોતિ પવુચ્ચતિ.

૨૪. ઉગ્ગો ચ સોમદેવો ચ, અહેસું અગ્ગુપટ્ઠકા;

સીવલા ચેવ સામા ચ, અહેસું અગ્ગુપટ્ઠિકા.

૨૫. ઉચ્ચત્તનેન સો બુદ્ધો, તિંસહત્થસમુગ્ગતો;

ઉક્કામુખે યથા કમ્બુ, એવં રંસીહિ મણ્ડિતો.

૨૬. તિંસવસ્સસહસ્સાનિ, આયુ બુદ્ધસ્સ તાવદે;

તાવતા તિટ્ઠમાનો સો, તારેસિ જનતં બહું.

૨૭. ધમ્મચેતિં સમુસ્સેત્વા, ધમ્મદુસ્સવિભૂસિતં;

ધમ્મપુપ્ફગુળં કત્વા, નિબ્બુતો સો સસાવકો.

૨૮. મહાવિલાસો તસ્સ જનો, સિરિધમ્મપ્પકાસનો;

સબ્બં તમન્તરહિતં, નનુ રિત્તા સબ્બસઙ્ખારા.

૨૯. કોણાગમનો સમ્બુદ્ધો, પબ્બતારામમ્હિ નિબ્બુતો;

ધાતુવિત્થારિકં આસિ, તેસુ તેસુ પદેસતોતિ.

કોણાગમનસ્સ ભગવતો વંસો તેવીસતિમો.