૨૦. ફુસ્સબુદ્ધવંસો

૧. તત્થેવ મણ્ડકપ્પમ્હિ, અહુ સત્થા અનુત્તરો;

અનુપમો અસમસમો, ફુસ્સો લોકગ્ગનાયકો.

૨. સોપિ સબ્બં તમં હન્ત્વા, વિજટેત્વા મહાજટં;

સદેવકં તપ્પયન્તો, અભિવસ્સિ અમતમ્બુના.

૩. ધમ્મચક્કં પવત્તેન્તે, ફુસ્સે નક્ખત્તમઙ્ગલે;

કોટિસતસહસ્સાનં, પઠમાભિસમયો અહુ.

૪. નવુતિસતસહસ્સાનં, દુતિયાભિસમયો અહુ;

અસીતિસતસહસ્સાનં, તતિયાભિસમયો અહુ.

૫. સન્નિપાતા તયો આસું, ફુસ્સસ્સાપિ મહેસિનો;

ખીણાસવાનં વિમલાનં, સન્તચિત્તાન તાદિનં.

૬. સટ્ઠિસતસહસ્સાનં, પઠમો આસિ સમાગમો;

પઞ્ઞાસસતસહસ્સાનં, દુતિયો આસિ સમાગમો.

૭. ચત્તારીસસતસહસ્સાનં, તતિયો આસિ સમાગમો;

અનુપાદા વિમુત્તાનં, વોચ્છિન્નપટિસન્ધિનં.

૮. અહં તેન સમયેન, વિજિતાવી નામ ખત્તિયો;

છડ્ડયિત્વા મહારજ્જં, પબ્બજિં તસ્સ સન્તિકે.

૯. સોપિ મં બુદ્ધો બ્યાકાસિ, ફુસ્સો લોકગ્ગનાયકો;

‘‘દ્વેનવુતે ઇતો કપ્પે, અયં બુદ્ધો ભવિસ્સતિ.

૧૦. ‘‘પધાનં પદહિત્વાન…પે… હેસ્સામ સમ્મુખા ઇમં’’.

૧૧. તસ્સાપિ વચનં સુત્વા, ભિય્યો ચિત્તં પસાદયિં;

ઉત્તરિં વતમધિટ્ઠાસિં, દસપારમિપૂરિયા.

૧૨. સુત્તન્તં વિનયઞ્ચાપિ, નવઙ્ગં સત્થુસાસનં;

સબ્બં પરિયાપુણિત્વા, સોભયિં જિનસાસનં.

૧૩. તત્થપ્પમત્તો વિહરન્તો, બ્રહ્મં ભાવેત્વ ભાવનં;

અભિઞ્ઞાસુ પારમિં ગન્ત્વા, બ્રહ્મલોકમગઞ્છહં.

૧૪. કાસિકં નામ નગરં, જયસેનો નામ ખત્તિયો;

સિરિમા નામ જનિકા, ફુસ્સસ્સાપિ મહેસિનો.

૧૫. નવવસ્સસહસ્સાનિ, અગારં અજ્ઝ સો વસિ;

ગરુળપક્ખ હંસ સુવણ્ણભારા, તયો પાસાદમુત્તમા.

૧૬. તિંસઇત્થિસહસ્સાનિ, નારિયો સમલઙ્કતા;

કિસાગોતમી નામ નારી, અનૂપમો નામ અત્રજો.

૧૭. નિમિત્તે ચતુરો દિસ્વા, હત્થિયાનેન નિક્ખમિ;

છમાસં પધાનચારં, અચરી પુરિસુત્તમો.

૧૮. બ્રહ્મુના યાચિતો સન્તો, ફુસ્સો લોકગ્ગનાયકો;

વત્તિ ચક્કં મહાવીરો, મિગદાયે નરુત્તમો.

૧૯. સુરક્ખિતો ધમ્મસેનો, અહેસું અગ્ગસાવકા;

સભિયો નામુપટ્ઠાકો, ફુસ્સસ્સાપિ મહેસિનો.

૨૦. ચાલા ચ ઉપચાલા ચ, અહેસું અગ્ગસાવિકા;

બોધિ તસ્સ ભગવતો, આમણ્ડોતિ પવુચ્ચતિ.

૨૧. ધનઞ્ચયો વિસાખો ચ, અહેસું અગ્ગુપટ્ઠકા;

પદુમા ચેવ નાગા ચ, અહેસું અગ્ગુપટ્ઠિકા.

૨૨. અટ્ઠપણ્ણાસરતનં, સોપિ અચ્ચુગ્ગતો મુનિ;

સોભતે સતરંસીવ, ઉળુરાજાવ પૂરિતો.

૨૩. નવુતિવસ્સસહસ્સાનિ, આયુ વિજ્જતિ તાવદે;

તાવતા તિટ્ઠમાનો સો, તારેસિ જનતં બહું.

૨૪. ઓવદિત્વા બહૂ સત્તે, સન્તારેત્વા બહૂ જને;

સોપિ સત્થા અતુલયસો, નિબ્બુતો સો સસાવકો.

૨૫. ફુસ્સો જિનવરો સત્થા, સેનારામમ્હિ નિબ્બુતો;

ધાતુવિત્થારિકં આસિ, તેસુ તેસુ પદેસતોતિ.

ફુસ્સસ્સ ભગવતો વંસો અટ્ઠારસમો.