૨૧. વિપસ્સીબુદ્ધવંસો

૧. ફુસ્સસ્સ ચ અપરેન, સમ્બુદ્ધો દ્વિપદુત્તમો;

વિપસ્સી નામ નામેન, લોકે ઉપ્પજ્જિ ચક્ખુમા.

૨. અવિજ્જં સબ્બં પદાલેત્વા, પત્તો સમ્બોધિમુત્તમં;

ધમ્મચક્કં પવત્તેતું, પક્કામિ બન્ધુમતીપુરં.

૩. ધમ્મચક્કં પવત્તેત્વા, ઉભો બોધેસિ નાયકો;

ગણનાય ન વત્તબ્બો, પઠમાભિસમયો અહુ.

૪. પુનાપરં અમિતયસો, તત્થ સચ્ચં પકાસયિ;

ચતુરાસીતિસહસ્સાનં, દુતિયાભિસમયો અહુ.

૫. ચતુરાસીતિસહસ્સાનિ, સમ્બુદ્ધં અનુપબ્બજું;

તેસમારામપત્તાનં, ધમ્મં દેસેસિ ચક્ખુમા.

૬. સબ્બાકારેન ભાસતો, સુત્વા ઉપનિસાદિનો [ઉપનિસ્સા જિનો (સ્યા. કં.)];

તેપિ ધમ્મવરં ગન્ત્વા, તતિયાભિસમયો અહુ.

૭. સન્નિપાતા તયો આસું, વિપસ્સિસ્સ મહેસિનો;

ખીણાસવાનં વિમલાનં, સન્તચિત્તાન તાદિનં.

૮. અટ્ઠસટ્ઠિસતસહસ્સાનં, પઠમો આસિ સમાગમો;

ભિક્ખુસતસહસ્સાનં, દુતિયો આસિ સમાગમો.

૯. અસીતિભિક્ખુસહસ્સાનં, તતિયો આસિ સમાગમો;

તત્થ ભિક્ખુગણમજ્ઝે, સમ્બુદ્ધો અતિરોચતિ.

૧૦. અહં તેન સમયેન, નાગરાજા મહિદ્ધિકો;

અતુલો નામ નામેન, પુઞ્ઞવન્તો જુતિન્ધરો.

૧૧. નેકાનં નાગકોટીનં, પરિવારેત્વાનહં તદા;

વજ્જન્તો દિબ્બતુરિયેહિ, લોકજેટ્ઠં ઉપાગમિં.

૧૨. ઉપસઙ્કમિત્વા સમ્બુદ્ધં, વિપસ્સિં લોકનાયકં;

મણિમુત્તરતનખચિતં, સબ્બાભરણવિભૂસિતં;

નિમન્તેત્વા ધમ્મરાજસ્સ, સુવણ્ણપીઠમદાસહં.

૧૩. સોપિ મં બુદ્ધો બ્યાકાસિ, સઙ્ઘમજ્ઝે નિસીદિય;

‘‘એકનવુતિતો કપ્પે, અયં બુદ્ધો ભવિસ્સતિ.

૧૪. ‘‘અહુ કપિલવ્હયા રમ્મા, નિક્ખમિત્વા તથાગતો;

પધાનં પદહિત્વાન, કત્વા દુક્કરકારિકં.

૧૫. ‘‘અજપાલરુક્ખમૂલસ્મિં, નિસીદિત્વા તથાગતો;

તત્થ પાયાસં પગ્ગય્હ, નેરઞ્જરમુપેહિતિ.

૧૬. ‘‘નેરઞ્જરાય તીરમ્હિ, પાયાસં અદ સો જિનો;

પટિયત્તવરમગ્ગેન, બોધિમૂલમુપેહિતિ.

૧૭. ‘‘તતો પદક્ખિણં કત્વા, બોધિમણ્ડં અનુત્તરો;

અસ્સત્થમૂલે સમ્બોધિં, બુજ્ઝિસ્સતિ મહાયસો.

૧૮. ‘‘ઇમસ્સ જનિકા માતા, માયા નામ ભવિસ્સતિ;

પિતા સુદ્ધોદનો નામ, અયં હેસ્સતિ ગોતમો.

૧૯. ‘‘અનાસવા વીતરાગા, સન્તચિત્તા સમાહિતા;

કોલિતો ઉપતિસ્સો ચ, અગ્ગા હેસ્સન્તિ સાવકા;

આનન્દો નામુપટ્ઠાકો, ઉપટ્ઠિસ્સતિમં જિનં.

૨૦. ‘‘ખેમા ઉપ્પલવણ્ણા ચ, અગ્ગા હેસ્સન્તિ સાવિકા;

અનાસવા વીતરાગા, સન્તચિત્તા સમાહિતા;

બોધિ તસ્સ ભગવતો, અસ્સત્થોતિ પવુચ્ચતિ.

૨૧. ‘‘ચિત્તો ચ હત્થાળવકો, અગ્ગા હેસ્સન્તુપટ્ઠકા;

નન્દમાતા ચ ઉત્તરા, અગ્ગા હેસ્સન્તુપટ્ઠિકા;

આયુ વસ્સસતં તસ્સ, ગોતમસ્સ યસસ્સિનો.

૨૨. ‘‘ઇદં સુત્વાન વચનં…પે… હેસ્સામ સમ્મુખા ઇમં’’.

૨૩. તસ્સાહં વચનં સુત્વા, ભિય્યો ચિત્તં પસાદયિં;

ઉત્તરિં વતમધિટ્ઠાસિં, દસપારમિપૂરિયા.

૨૪. નગરં બન્ધુમતી નામ, બન્ધુમા નામ ખત્તિયો;

માતા બન્ધુમતી નામ, વિપસ્સિસ્સ મહેસિનો.

૨૫. અટ્ઠવસ્સસહસ્સાનિ, અગારં અજ્ઝ સો વસિ;

નન્દો સુનન્દો સિરિમા, તયો પાસાદમુત્તમા.

૨૬. તિચત્તારીસસહસ્સાનિ, નારિયો સમલઙ્કતા;

સુદસ્સના નામ સા નારી, સમવત્તક્ખન્ધો નામ અત્રજો.

૨૭. નિમિત્તે ચતુરો દિસ્વા, રથયાનેન નિક્ખમિ;

અનૂનઅટ્ઠમાસાનિ, પધાનં પદહી જિનો.

૨૮. બ્રહ્મુના યાચિતો સન્તો, વિપસ્સી લોકનાયકો;

વત્તિ ચક્કં મહાવીરો, મિગદાયે નરુત્તમો.

૨૯. ખણ્ડો ચ તિસ્સનામો ચ, અહેસું અગ્ગસાવકા;

અસોકો નામુપટ્ઠાકો, વિપસ્સિસ્સ મહેસિનો.

૩૦. ચન્દા ચ ચન્દમિત્તા ચ, અહેસું અગ્ગસાવિકા;

બોધિ તસ્સ ભગવતો, પાટલીતિ પવુચ્ચતિ.

૩૧. પુનબ્બસુમિત્તો નાગો ચ, અહેસું અગ્ગુપટ્ઠકા;

સિરિમા ઉત્તરા ચેવ, અહેસું અગ્ગુપટ્ઠિકા.

૩૨. અસીતિહત્થમુબ્બેધો, વિપસ્સી લોકનાયકો;

પભા નિદ્ધાવતિ તસ્સ, સમન્તા સત્તયોજને.

૩૩. અસીતિવસ્સસહસ્સાનિ, આયુ બુદ્ધસ્સ તાવદે;

તાવતા તિટ્ઠમાનો સો, તારેસિ જનતં બહું.

૩૪. બહુદેવમનુસ્સાનં, બન્ધના પરિમોચયિ;

મગ્ગામગ્ગઞ્ચ આચિક્ખિ, અવસેસપુથુજ્જને.

૩૫. આલોકં દસ્સયિત્વાન, દેસેત્વા અમતં પદં;

જલિત્વા અગ્ગિક્ખન્ધોવ, નિબ્બુતો સો સસાવકો.

૩૬. ઇદ્ધિવરં પુઞ્ઞવરં, લક્ખણઞ્ચ કુસુમિતં;

સબ્બં તમન્તરહિતં, નનુ રિત્તા સબ્બસઙ્ખારા.

૩૭. વિપસ્સી જિનવરો બુદ્ધો, સુમિત્તારામમ્હિ નિબ્બુતો;

તત્થેવસ્સ થૂપવરો, સત્તયોજનમુસ્સિતોતિ.

વિપસ્સિસ્સ ભગવતો વંસો એકૂનવીસતિમો.