૧૯. તિસ્સબુદ્ધવંસો

૧. સિદ્ધત્થસ્સ અપરેન, અસમો અપ્પટિપુગ્ગલો;

અનન્તતેજો અમિતયસો, તિસ્સો લોકગ્ગનાયકો.

૨. તમન્ધકારં વિધમિત્વા, ઓભાસેત્વા સદેવકં;

અનુકમ્પકો મહાવીરો, લોકે ઉપ્પજ્જિ ચક્ખુમા.

૩. તસ્સાપિ અતુલા ઇદ્ધિ, અતુલં સીલં સમાધિ ચ;

સબ્બત્થ પારમિં ગન્ત્વા, ધમ્મચક્કં પવત્તયિ.

૪. સો બુદ્ધો દસસહસ્સિમ્હિ, વિઞ્ઞાપેસિ ગિરં સુચિં;

કોટિસતાનિ અભિસમિંસુ, પઠમે ધમ્મદેસને.

૫. દુતિયો નવુતિકોટીનં, તતિયો સટ્ઠિકોટિયો;

બન્ધનાતો પમોચેસિ, સત્તે [સમ્પત્તે (ક.)] નરમરૂ તદા.

૬. સન્નિપાતા તયો આસું, તિસ્સે લોકગ્ગનાયકે;

ખીણાસવાનં વિમલાનં, સન્તચિત્તાન તાદિનં.

૭. ખીણાસવસતસહસ્સાનં, પઠમો આસિ સમાગમો;

નવુતિસતસહસ્સાનં, દુતિયો આસિ સમાગમો.

૮. અસીતિસતસહસ્સાનં, તતિયો આસિ સમાગમો;

ખીણાસવાનં વિમલાનં, પુપ્ફિતાનં વિમુત્તિયા.

૯. અહં તેન સમયેન, સુજાતો નામ ખત્તિયો;

મહાભોગં છડ્ડયિત્વા, પબ્બજિં ઇસિપબ્બજં.

૧૦. મયિ પબ્બજિતે સન્તે, ઉપ્પજ્જિ લોકનાયકો;

બુદ્ધોતિ સદ્દં સુત્વાન, પીતિ મે ઉપપજ્જથ.

૧૧. દિબ્બં મન્દારવં પુપ્ફં, પદુમં પારિછત્તકં;

ઉભો હત્થેહિ પગ્ગય્હ, ધુનમાનો ઉપાગમિં.

૧૨. ચતુવણ્ણપરિવુતં, તિસ્સં લોકગ્ગનાયકં;

તમહં પુપ્ફં ગહેત્વા, મત્થકે ધારયિં જિનં.

૧૩. સોપિ મં બુદ્ધો બ્યાકાસિ, જનમજ્ઝે નિસીદિય;

‘‘દ્વેનવુતે ઇતો કપ્પે, અયં બુદ્ધો ભવિસ્સતિ.

૧૪. ‘‘પધાનં પદહિત્વાન…પે… હેસ્સામ સમ્મુખા ઇમં’’.

૧૫. તસ્સાપિ વચનં સુત્વા, ભિય્યો ચિત્તં પસાદયિં;

ઉત્તરિં વતમધિટ્ઠાસિં, દસપારમિપૂરિયા.

૧૬. ખેમકં નામ નગરં, જનસન્ધો નામ ખત્તિયો;

પદુમા નામ જનિકા, તિસ્સસ્સ ચ મહેસિનો.

૧૭. સત્તવસ્સસહસ્સાનિ, અગારં અજ્ઝ સો વસિ;

ગુહાસેલ નારિસય નિસભા [કુમુદો નાળિયો પદુમો (ક.)], તયો પાસાદમુત્તમા.

૧૮. સમતિંસસહસ્સાનિ, નારિયો સમલઙ્કતા;

સુભદ્દાનામિકા નારી, આનન્દો નામ અત્રજો.

૧૯. નિમિત્તે ચતુરો દિસ્વા, અસ્સયાનેન નિક્ખમિ;

અનૂનઅટ્ઠમાસાનિ, પધાનં પદહી જિનો.

૨૦. બ્રહ્મુના યાચિતો સન્તો, તિસ્સો લોકગ્ગનાયકો;

વત્તિ ચક્કં મહાવીરો, યસવતિયમુત્તમે.

૨૧. બ્રહ્મદેવો ઉદયો ચ, અહેસું અગ્ગસાવકા;

સમઙ્ગો નામુપટ્ઠાકો, તિસ્સસ્સ ચ મહેસિનો.

૨૨. ફુસ્સા ચેવ સુદત્તા ચ, અહેસું અગ્ગસાવિકા;

બોધિ તસ્સ ભગવતો, અસનોતિ પવુચ્ચતિ.

૨૩. સમ્બલો ચ સિરિમા ચેવ, અહેસું અગ્ગુપટ્ઠકા;

કિસાગોતમી ઉપસેના, અહેસું અગ્ગુપટ્ઠિકા.

૨૪. સો બુદ્ધો સટ્ઠિરતનો, અહુ ઉચ્ચત્તને જિનો;

અનૂપમો અસદિસો, હિમવા વિય દિસ્સતિ.

૨૫. તસ્સાપિ અતુલતેજસ્સ, આયુ આસિ અનુત્તરો;

વસ્સસતસહસ્સાનિ, લોકે અટ્ઠાસિ ચક્ખુમા.

૨૬. ઉત્તમં પવરં સેટ્ઠં, અનુભોત્વા મહાયસં;

જલિત્વા અગ્ગિક્ખન્ધોવ, નિબ્બુતો સો સસાવકો.

૨૭. વલાહકોવ અનિલેન, સૂરિયેન વિય ઉસ્સવો;

અન્ધકારોવ પદીપેન, નિબ્બુતો સો સસાવકો.

૨૮. તિસ્સો જિનવરો બુદ્ધો, નન્દારામમ્હિ નિબ્બુતો;

તત્થેવસ્સ જિનથૂપો, તીણિયોજનમુગ્ગતોતિ.

તિસ્સસ્સ ભગવતો વંસો સત્તરસમો.