૧૬. અત્થદસ્સીબુદ્ધવંસો

૧. તત્થેવ મણ્ડકપ્પમ્હિ, અત્થદસ્સી મહાયસો;

મહાતમં નિહન્ત્વાન, પત્તો સમ્બોધિમુત્તમં.

૨. બ્રહ્મુના યાચિતો સન્તો, ધમ્મચક્કં પવત્તયિ;

અમતેન તપ્પયી લોકં, દસસહસ્સિસદેવકં.

૩. તસ્સાપિ લોકનાથસ્સ, અહેસું અભિસમયા તયો;

કોટિસતસહસ્સાનં, પઠમાભિસમયો અહુ.

૪. યદા બુદ્ધો અત્થદસ્સી, ચરતે દેવચારિકં;

કોટિસતસહસ્સાનં, દુતિયાભિસમયો અહુ.

૫. પુનાપરં યદા બુદ્ધો, દેસેસિ પિતુસન્તિકે;

કોટિસતસહસ્સાનં, તતિયાભિસમયો અહુ.

૬. સન્નિપાતા તયો આસું, તસ્સાપિ ચ મહેસિનો;

ખીણાસવાનં વિમલાનં, સન્તચિત્તાન તાદિનં.

૭. અટ્ઠનવુતિસહસ્સાનં, પઠમો આસિ સમાગમો;

અટ્ઠાસીતિસહસ્સાનં, દુતિયો આસિ સમાગમો.

૮. અટ્ઠસત્તતિસતસહસ્સાનં, તતિયો આસિ સમાગમો;

અનુપાદા વિમુત્તાનં, વિમલાનં મહેસિનં.

૯. અહં તેન સમયેન, જટિલો ઉગ્ગતાપનો;

સુસીમો નામ નામેન, મહિયા સેટ્ઠસમ્મતો.

૧૦. દિબ્બં મન્દારવં પુપ્ફં, પદુમં પારિછત્તકં;

દેવલોકાહરિત્વાન, સમ્બુદ્ધમભિપૂજયિં.

૧૧. સોપિ મં બુદ્ધો બ્યાકાસિ, અત્થદસ્સી મહામુનિ;

‘‘અટ્ઠારસે કપ્પસતે, અયં બુદ્ધો ભવિસ્સતિ.

૧૨. ‘‘પધાનં પદહિત્વાન…પે… હેસ્સામ સમ્મુખા ઇમં’’.

૧૩. તસ્સાપિ વચનં સુત્વા, હટ્ઠો [તુટ્ઠો (સ્યા. કં.)] સંવિગ્ગમાનસો;

ઉત્તરિં વતમધિટ્ઠાસિં, દસપારમિપૂરિયા.

૧૪. સોભણં નામ નગરં, સાગરો નામ ખત્તિયો;

સુદસ્સના નામ જનિકા, અત્થદસ્સિસ્સ સત્થુનો.

૧૫. દસવસ્સસહસ્સાનિ, અગારં અજ્ઝ સો વસિ;

અમરગિરિ સુગિરિ વાહના, તયો પાસાદમુત્તમા.

૧૬. તેત્તિંસઞ્ચ સહસ્સાનિ, નારિયો સમલઙ્કતા;

વિસાખા નામ નારી ચ, સેલો નામાસિ અત્રજો.

૧૭. નિમિત્તે ચતુરો દિસ્વા, અસ્સયાનેન નિક્ખમિ;

અનૂનઅટ્ઠમાસાનિ, પધાનં પદહી જિનો.

૧૮. બ્રહ્મુના યાચિતો સન્તો, અત્થદસ્સી મહાયસો;

વત્તિ ચક્કં મહાવીરો, અનોમુય્યાને નરાસભો.

૧૯. સન્તો ચ ઉપસન્તો ચ, અહેસું અગ્ગસાવકા;

અભયો નામુપટ્ઠાકો, અત્થદસ્સિસ્સ સત્થુનો.

૨૦. ધમ્મા ચેવ સુધમ્મા ચ, અહેસું અગ્ગસાવિકા;

બોધિ તસ્સ ભગવતો, ચમ્પકોતિ પવુચ્ચતિ.

૨૧. નકુલો ચ નિસભો ચ, અહેસું અગ્ગુપટ્ઠકા;

મકિલા ચ સુનન્દા ચ, અહેસું અગ્ગુપટ્ઠિકા.

૨૨. સોપિ બુદ્ધો અસમસમો, અસીતિહત્થમુગ્ગતો;

સોભતે સાલરાજાવ, ઉળુરાજાવ પૂરિતો.

૨૩. તસ્સ પાકતિકા રંસી, અનેકસતકોટિયો;

ઉદ્ધં અધો દસ દિસા, ફરન્તિ યોજનં સદા.

૨૪. સોપિ બુદ્ધો નરાસભો, સબ્બસત્તુત્તમો મુનિ;

વસ્સસતસહસ્સાનિ, લોકે અટ્ઠાસિ ચક્ખુમા.

૨૫. અતુલં દસ્સેત્વા ઓભાસં, વિરોચેત્વા સદેવકે [અતુલં દસ્સયિત્વાન, ઓભાસેત્વા સદેવકે (સી. ક.)];

સોપિ અનિચ્ચતં પત્તો, યથગ્ગુપાદાનસઙ્ખયા.

૨૬. અત્થદસ્સી જિનવરો, અનોમારામમ્હિ નિબ્બુતો;

ધાતુવિત્થારિકં આસિ, તેસુ તેસુ પદેસતોતિ.

અત્થદસ્સિસ્સ ભગવતો વંસો ચુદ્દસમો.