૧૭. ધમ્મદસ્સીબુદ્ધવંસો

૧. તત્થેવ મણ્ડકપ્પમ્હિ, ધમ્મદસ્સી મહાયસો;

તમન્ધકારં વિધમિત્વા, અતિરોચતિ સદેવકે.

૨. તસ્સાપિ અતુલતેજસ્સ, ધમ્મચક્કપ્પવત્તને;

કોટિસતસહસ્સાનં, પઠમાભિસમયો અહુ.

૩. યદા બુદ્ધો ધમ્મદસ્સી, વિનેસિ સઞ્જયં ઇસિં;

તદા નવુતિકોટીનં, દુતિયાભિસમયો અહુ.

૪. યદા સક્કો ઉપાગઞ્છિ, સપરિસો વિનાયકં;

તદા અસીતિકોટીનં, તતિયાભિસમયો અહુ.

૫. તસ્સાપિ દેવદેવસ્સ, સન્નિપાતા તયો અહું [આસું (સી. સ્યા.)];

ખીણાસવાનં વિમલાનં, સન્તચિત્તાન તાદિનં.

૬. યદા બુદ્ધો ધમ્મદસ્સી, સરણે વસ્સં ઉપાગમિ;

તદા કોટિસતસહસ્સાનં [કોટિસહસ્સાનં (સી. સ્યા. કં.)], પઠમો આસિ સમાગમો.

૭. પુનાપરં યદા બુદ્ધો, દેવતો એતિ માનુસં;

તદાપિ સતકોટીનં, દુતિયો આસિ સમાગમો.

૮. પુનાપરં યદા બુદ્ધો, પકાસેસિ ધુતે ગુણે;

તદા અસીતિકોટીનં, તતિયો આસિ સમાગમો.

૯. અહં તેન સમયેન, સક્કો આસિં પુરિન્દદો;

દિબ્બેન ગન્ધમાલેન, તુરિયેનાભિપૂજયિં.

૧૦. સોપિ મં બુદ્ધો બ્યાકાસિ, દેવમજ્ઝે નિસીદિય;

‘‘અટ્ઠારસે કપ્પસતે, અયં બુદ્ધો ભવિસ્સતિ.

૧૧. ‘‘પધાનં પદહિત્વાન…પે… હેસ્સામ સમ્મુખા ઇમં’’.

૧૨. તસ્સાપિ વચનં સુત્વા, ભિય્યો ચિત્તં પસાદયિં;

ઉત્તરિં વતમધિટ્ઠાસિં, દસપારમિપૂરિયા.

૧૩. સરણં નામ નગરં, સરણો નામ ખત્તિયો;

સુનન્દા નામ જનિકા, ધમ્મદસ્સિસ્સ સત્થુનો.

૧૪. અટ્ઠવસ્સસહસ્સાનિ, અગારં અજ્ઝ સો વસિ;

અરજો વિરજો સુદસ્સનો, તયો પાસાદમુત્તમા.

૧૫. તિચત્તારીસસહસ્સાનિ [ચત્તાલીસસહસ્સાનિ (સ્યા. કં.)], નારિયો સમલઙ્કતા;

વિચિકોળિ નામ નારી, અત્રજો પુઞ્ઞવડ્ઢનો.

૧૬. નિમિત્તે ચતુરો દિસ્વા, પાસાદેનાભિનિક્ખમિ;

સત્તાહં પધાનચારં, અચરી પુરિસુત્તમો.

૧૭. બ્રહ્મુના યાચિતો સન્તો, ધમ્મદસ્સી નરાસભો;

વત્તિ ચક્કં મહાવીરો, મિગદાયે નરુત્તમો.

૧૮. પદુમો ફુસ્સદેવો ચ, અહેસું અગ્ગસાવકા;

સુનેત્તો [સુદત્તો (સ્યા. કં.)] નામુપટ્ઠાકો, ધમ્મદસ્સિસ્સ સત્થુનો.

૧૯. ખેમા ચ સચ્ચનામા ચ, અહેસું અગ્ગસાવિકા;

બોધિ તસ્સ ભગવતો, બિમ્બિજાલોતિ વુચ્ચતિ.

૨૦. સુભદ્દો કટિસ્સહો ચેવ, અહેસું અગ્ગુપટ્ઠકા;

સાળિયા [સાલિસા (સ્યા. કં.)] ચ કળિયા ચ, અહેસું અગ્ગુપટ્ઠિકા.

૨૧. સોપિ બુદ્ધો અસમસમો, અસીતિહત્થમુગ્ગતો;

અતિરોચતિ તેજેન, દસસહસ્સિમ્હિ ધાતુયા.

૨૨. સુફુલ્લો સાલરાજાવ, વિજ્જૂવ ગગને યથા;

મજ્ઝન્હિકેવ સૂરિયો, એવં સો ઉપસોભથ.

૨૩. તસ્સાપિ અતુલતેજસ્સ, સમકં આસિ જીવિતં;

વસ્સસતસહસ્સાનિ, લોકે અટ્ઠાસિ ચક્ખુમા.

૨૪. ઓભાસં દસ્સયિત્વાન, વિમલં કત્વાન સાસનં;

ચવિ ચન્દોવ ગગને, નિબ્બુતો સો સસાવકો.

૨૫. ધમ્મદસ્સી મહાવીરો, સાલારામમ્હિ નિબ્બુતો;

તત્થેવસ્સ થૂપવરો, તીણિયોજનમુગ્ગતોતિ.

ધમ્મદસ્સિસ્સ ભગવતો વંસો પન્નરસમો.