૧૫. પિયદસ્સીબુદ્ધવંસો

૧. સુજાતસ્સ અપરેન, સયમ્ભૂ લોકનાયકો;

દુરાસદો અસમસમો, પિયદસ્સી મહાયસો.

૨. સોપિ બુદ્ધો અમિતયસો, આદિચ્ચોવ વિરોચતિ;

સબ્બં તમં નિહન્ત્વાન, ધમ્મચક્કં પવત્તયિ.

૩. તસ્સાપિ અતુલતેજસ્સ, અહેસું અભિસમયા તયો;

કોટિસતસહસ્સાનં, પઠમાભિસમયો અહુ.

૪. સુદસ્સનો દેવરાજા, મિચ્છાદિટ્ઠિમરોચયિ;

તસ્સ દિટ્ઠિં વિનોદેન્તો, સત્થા ધમ્મમદેસયિ.

૫. જનસન્નિપાતો અતુલો, મહાસન્નિપતી તદા;

નવુતિકોટિસહસ્સાનં, દુતિયાભિસમયો અહુ.

૬. યદા દોણમુખં હત્થિં, વિનેસિ નરસારથિ;

અસીતિકોટિસહસ્સાનં, તતિયાભિસમયો અહુ.

૭. સન્નિપાતા તયો આસું, તસ્સાપિ પિયદસ્સિનો;

કોટિસતસહસ્સાનં, પઠમો આસિ સમાગમો.

૮. તતો પરં નવુતિકોટી, સમિંસુ એકતો મુની;

તતિયે સન્નિપાતમ્હિ, અસીતિકોટિયો અહૂ.

૯. અહં તેન સમયેન, કસ્સપો નામ બ્રાહ્મણો [માનવો (સ્યા. કં.)];

અજ્ઝાયકો મન્તધરો, તિણ્ણં વેદાન પારગૂ.

૧૦. તસ્સ ધમ્મં સુણિત્વાન, પસાદં જનયિં અહં;

કોટિસતસહસ્સેહિ, સઙ્ઘારામં અમાપયિં.

૧૧. તસ્સ દત્વાન આરામં, હટ્ઠો સંવિગ્ગમાનસો;

સરણે પઞ્ચ સીલે ચ [સરણં પઞ્ચસીલઞ્ચ (સી.)], દળ્હં કત્વા સમાદિયિં.

૧૨. સોપિ મં બુદ્ધો બ્યાકાસિ, સઙ્ઘમજ્ઝે નિસીદિય;

‘‘અટ્ઠારસે કપ્પસતે, અયં બુદ્ધો ભવિસ્સતિ.

૧૩. ‘‘પધાનં પદહિત્વાન…પે… હેસ્સામ સમ્મુખા ઇમં’’.

૧૪. તસ્સાપિ વચનં સુત્વા, ભિય્યો ચિત્તં પસાદયિં;

ઉત્તરિં વતમધિટ્ઠાસિં, દસપારમિપૂરિયા.

૧૫. સુધઞ્ઞં નામ નગરં, સુદત્તો નામ ખત્તિયો;

ચન્દા નામાસિ જનિકા, પિયદસ્સિસ્સ સત્થુનો.

૧૬. નવવસ્સસહસ્સાનિ, અગારં અજ્ઝ સો વસિ;

સુનિમ્મલવિમલગિરિગુહા, તયો પાસાદમુત્તમા.

૧૭. તેત્તિંસસહસ્સાનિ ચ, નારિયો સમલઙ્કતા;

વિમલા નામ નારી ચ, કઞ્ચનાવેળો નામ અત્રજો.

૧૮. નિમિત્તે ચતુરો દિસ્વા, રથયાનેન નિક્ખમિ;

છમાસં પધાનચારં, અચરી પુરિસુત્તમો.

૧૯. બ્રહ્મુના યાચિતો સન્તો, પિયદસ્સી મહામુનિ;

વત્તિ ચક્કં મહાવીરો, ઉસભુય્યાને મનોરમે.

૨૦. પાલિતો સબ્બદસ્સી ચ, અહેસું અગ્ગસાવકા;

સોભિતો નામુપટ્ઠાકો, પિયદસ્સિસ્સ સત્થુનો.

૨૧. સુજાતા ધમ્મદિન્ના ચ, અહેસું અગ્ગસાવિકા;

બોધિ તસ્સ ભગવતો, કકુધોતિ પવુચ્ચતિ.

૨૨. સન્ધકો ધમ્મકો ચેવ, અહેસું અગ્ગુપટ્ઠકા;

વિસાખા ધમ્મદિન્ના ચ, અહેસું અગ્ગુપટ્ઠિકા.

૨૩. સોપિ બુદ્ધો અમિતયસો, દ્વત્તિંસવરલક્ખણો;

અસીતિહત્થમુબ્બેધો, સાલરાજાવ દિસ્સતિ.

૨૪. અગ્ગિચન્દસૂરિયાનં, નત્થિ તાદિસિકા પભા;

યથા અહુ પભા તસ્સ, અસમસ્સ મહેસિનો.

૨૫. તસ્સાપિ દેવદેવસ્સ, આયુ તાવતકં અહુ;

નવુતિવસ્સસહસ્સાનિ, લોકે અટ્ઠાસિ ચક્ખુમા.

૨૬. સોપિ બુદ્ધો અસમસમો, યુગાનિપિ તાનિ અતુલિયાનિ;

સબ્બં તમન્તરહિતં, નનુ રિત્તા સબ્બસઙ્ખારા.

૨૭. પિયદસ્સી મુનિવરો, અસ્સત્થારામમ્હિ નિબ્બુતો;

તત્થેવસ્સ જિનથૂપો, તીણિયોજનમુગ્ગતોતિ.

પિયદસ્સિસ્સ ભગવતો વંસો તેરસમો.