૧૨. પદુમુત્તરબુદ્ધવંસો

૧. નારદસ્સ અપરેન, સમ્બુદ્ધો દ્વિપદુત્તમો;

પદુમુત્તરો નામ જિનો, અક્ખોભો સાગરૂપમો.

૨. મણ્ડકપ્પોવ સો આસિ, યમ્હિ બુદ્ધો અજાયથ;

ઉસ્સન્નકુસલા જનતા, તમ્હિ કપ્પે અજાયથ.

૩. પદુમુત્તરસ્સ ભગવતો, પઠમે ધમ્મદેસને;

કોટિસતસહસ્સાનં, ધમ્માભિસમયો અહુ.

૪. તતો પરમ્પિ વસ્સન્તે, તપ્પયન્તે ચ પાણિને;

સત્તતિંસસતસહસ્સાનં, દુતિયાભિસમયો અહુ.

૫. યમ્હિ કાલે મહાવીરો, આનન્દં ઉપસઙ્કમિ;

પિતુસન્તિકં ઉપગન્ત્વા, આહની અમતદુન્દુભિં.

૬. આહતે અમતભેરિમ્હિ, વસ્સન્તે ધમ્મવુટ્ઠિયા;

પઞ્ઞાસસતસહસ્સાનં, તતિયાભિસમયો અહુ.

૭. ઓવાદકો વિઞ્ઞાપકો, તારકો સબ્બપાણિનં;

દેસનાકુસલો બુદ્ધો, તારેસિ જનતં બહું.

૮. સન્નિપાતા તયો આસું, પદુમુત્તરસ્સ સત્થુનો;

કોટિસતસહસ્સાનં, પઠમો આસિ સમાગમો.

૯. યદા બુદ્ધો અસમસમો, વસિ વેભારપબ્બતે;

નવુતિકોટિસહસ્સાનં, દુતિયો આસિ સમાગમો.

૧૦. પુન ચારિકં પક્કન્તે, ગામનિગમરટ્ઠતો;

અસીતિકોટિસહસ્સાનં, તતિયો આસિ સમાગમો.

૧૧. અહં તેન સમયેન, જટિલો નામ રટ્ઠિકો;

સમ્બુદ્ધપ્પમુખં સઙ્ઘં, સભત્તં દુસ્સમદાસહં.

૧૨. સોપિ મં બુદ્ધો બ્યાકાસિ, સઙ્ઘમજ્ઝે નિસીદિય;

‘‘સતસહસ્સિતો કપ્પે, અયં બુદ્ધો ભવિસ્સતિ.

૧૩. ‘‘પધાનં પદહિત્વાન…પે… હેસ્સામ સમ્મુખા ઇમં’’.

૧૪. તસ્સાપિ વચનં સુત્વા, ઉત્તરિં વતમધિટ્ઠહિં;

અકાસિં ઉગ્ગદળ્હં ધિતિં, દસપારમિપૂરિયા.

૧૫. બ્યાહતા તિત્થિયા સબ્બે, વિમના દુમ્મના તદા;

ન તેસં કેચિ પરિચરન્તિ, રટ્ઠતો નિચ્છુભન્તિ તે.

૧૬. સબ્બે તત્થ સમાગન્ત્વા, ઉપગચ્છું બુદ્ધસન્તિકે;

તુવં નાથો મહાવીર, સરણં હોહિ ચક્ખુમ.

૧૭. અનુકમ્પકો કારુણિકો, હિતેસી સબ્બપાણિનં;

સમ્પત્તે તિત્થિયે સબ્બે, પઞ્ચસીલે પતિટ્ઠપિ.

૧૮. એવં નિરાકુલં આસિ, સુઞ્ઞતં તિત્થિયેહિ તં;

વિચિત્તં અરહન્તેહિ, વસીભૂતેહિ તાદિહિ.

૧૯. નગરં હંસવતી નામ, આનન્દો નામ ખત્તિયો;

સુજાતા નામ જનિકા, પદુમુત્તરસ્સ સત્થુનો.

૨૦. દસવસ્સસહસ્સાનિ, અગારં અજ્ઝ સો વસિ;

નરવાહનો યસો વસવત્તી [નારિવાહનો યસવતી (સ્યા. કં.)], તયો પાસાદમુત્તમા.

૨૧. તિચત્તારીસસહસ્સાનિ, નારિયો સમલઙ્કતા;

વસુદત્તા નામ નારી, ઉત્તમો નામ અત્રજો.

૨૨. નિમિત્તે ચતુરો દિસ્વા, પાસાદેનાભિનિક્ખમિ;

સત્તાહં પધાનચારં, અચરી પુરિસુત્તમો.

૨૩. બ્રહ્મુના યાચિતો સન્તો, પદુમુત્તરો વિનાયકો;

વત્તિ ચક્કં મહાવીરો, મિથિલુય્યાનમુત્તમે.

૨૪. દેવલો ચ સુજાતો ચ, અહેસું અગ્ગસાવકા;

સુમનો નામુપટ્ઠાકો, પદુમુત્તરસ્સ મહેસિનો.

૨૫. અમિતા ચ અસમા ચ, અહેસું અગ્ગસાવિકા;

બોધિ તસ્સ ભગવતો, સલલોતિ પવુચ્ચતિ.

૨૬. વિતિણ્ણો ચેવ [અમિતો ચેવ (સ્યા.)] તિસ્સો ચ, અહેસું અગ્ગુપટ્ઠકા;

હટ્ઠા ચેવ વિચિત્તા ચ, અહેસું અગ્ગુપટ્ઠિકા.

૨૭. અટ્ઠપણ્ણાસરતનં, અચ્ચુગ્ગતો મહામુનિ;

કઞ્ચનગ્ઘિયસઙ્કાસો, દ્વત્તિંસવરલક્ખણો.

૨૮. કુટ્ટા કવાટા ભિત્તી ચ, રુક્ખા નગસિલુચ્ચયા;

ન તસ્સાવરણં અત્થિ, સમન્તા દ્વાદસયોજને.

૨૯. વસ્સસતસહસ્સાનિ, આયુ વિજ્જતિ તાવદે;

તાવતા તિટ્ઠમાનો સો, તારેસિ જનતં બહું.

૩૦. સન્તારેત્વા બહુજનં, છિન્દિત્વા સબ્બસંસયં;

જલિત્વા અગ્ગિક્ખન્ધોવ નિબ્બુતો સો સસાવકો.

૩૧. પદુમુત્તરો જિનો બુદ્ધો, નન્દારામમ્હિ નિબ્બુતો;

તત્થેવસ્સ થૂપવરો, દ્વાદસુબ્બેધયોજનોતિ.

પદુમુત્તરસ્સ ભગવતો વંસો દસમો.