૧૩. સુમેધબુદ્ધવંસો

૧. પદુમુત્તરસ્સ અપરેન, સુમેધો નામ નાયકો;

દુરાસદો ઉગ્ગતેજો, સબ્બલોકુત્તમો મુનિ.

૨. પસન્નનેત્તો સુમુખો, બ્રહા ઉજુ પતાપવા;

હિતેસી સબ્બસત્તાનં, બહૂ મોચેસિ બન્ધના.

૩. યદા બુદ્ધો પાપુણિત્વા, કેવલં બોધિમુત્તમં;

સુદસ્સનમ્હિ નગરે, ધમ્મચક્કં પવત્તયિ.

૪. તસ્સાપિ અભિસમયા તીણિ, અહેસું ધમ્મદેસને;

કોટિસતસહસ્સાનં, પઠમાભિસમયો અહુ.

૫. પુનાપરં કુમ્ભકણ્ણં, યક્ખં સો દમયી જિનો;

નવુતિકોટિસહસ્સાનં, દુતિયાભિસમયો અહુ.

૬. પુનાપરં અમિતયસો, ચતુસચ્ચં પકાસયિ;

અસીતિકોટિસહસ્સાનં, તતિયાભિસમયો અહુ.

૭. સન્નિપાતા તયો આસું, સુમેધસ્સ મહેસિનો;

ખીણાસવાનં વિમલાનં, સન્તચિત્તાન તાદિનં.

૮. સુદસ્સનં નામ નગરં, ઉપગઞ્છિ જિનો યદા;

તદા ખીણાસવા ભિક્ખૂ, સમિંસુ સતકોટિયો.

૯. પુનાપરં દેવકૂટે, ભિક્ખૂનં કથિનત્થતે;

તદા નવુતિકોટીનં, દુતિયો આસિ સમાગમો.

૧૦. પુનાપરં દસબલો, યદા ચરતિ ચારિકં;

તદા અસીતિકોટીનં, તતિયો આસિ સમાગમો.

૧૧. અહં તેન સમયેન, ઉત્તરો નામ માણવો;

અસીતિકોટિયો મય્હં, ઘરે સન્નિચિતં ધનં.

૧૨. કેવલં સબ્બં દત્વાન, સસઙ્ઘે લોકનાયકે;

સરણં તસ્સુપગઞ્છિં, પબ્બજ્જઞ્ચાભિરોચયિં.

૧૩. સોપિ મં બુદ્ધો બ્યાકાસિ, કરોન્તો અનુમોદનં;

‘‘તિંસકપ્પસહસ્સમ્હિ, અયં બુદ્ધો ભવિસ્સતિ.

૧૪. ‘‘પધાનં પદહિત્વાન…પે… હેસ્સામ સમ્મુખા ઇમં’’.

૧૫. તસ્સાપિ વચનં સુત્વા, ભિય્યો ચિત્તં પસાદયિં;

ઉત્તરિં વતમધિટ્ઠાસિં, દસપારમિપૂરિયા.

૧૬. સુત્તન્તં વિનયઞ્ચાપિ, નવઙ્ગં સત્થુસાસનં;

સબ્બં પરિયાપુણિત્વાન, સોભયિં જિનસાસનં.

૧૭. તત્થપ્પમત્તો વિહરન્તો, નિસજ્જટ્ઠાનચઙ્કમે;

અભિઞ્ઞાસુ પારમિં ગન્ત્વા, બ્રહ્મલોકમગઞ્છહં.

૧૮. સુદસ્સનં નામ નગરં, સુદત્તો નામ ખત્તિયો;

સુદત્તા નામ જનિકા, સુમેધસ્સ મહેસિનો.

૧૯. નવવસ્સસહસ્સાનિ, અગારં અજ્ઝ સો વસિ;

સુચન્દકઞ્ચનસિરિવડ્ઢા, તયો પાસાદમુત્તમા.

૨૦. તિસોળસસહસ્સાનિ, નારિયો સમલઙ્કતા;

સુમના નામ સા નારી, પુનબ્બસુ નામ અત્રજો.

૨૧. નિમિત્તે ચતુરો દિસ્વા, હત્થિયાનેન નિક્ખમિ;

અનૂનકં અડ્ઢમાસં, પધાનં પદહી જિનો.

૨૨. બ્રહ્મુના યાચિતો સન્તો, સુમેધો લોકનાયકો;

વત્તિ ચક્કં મહાવીરો, સુદસ્સનુય્યાનમુત્તમે.

૨૩. સરણો સબ્બકામો ચ, અહેસું અગ્ગસાવકા;

સાગરો નામુપટ્ઠાકો, સુમેધસ્સ મહેસિનો.

૨૪. રામા ચેવ સુરામા ચ, અહેસું અગ્ગસાવિકા;

બોધિ તસ્સ ભગવતો, મહાનીપોતિ વુચ્ચતિ.

૨૫. ઉરુવેલા યસવા ચ, અહેસું અગ્ગુપટ્ઠકા;

યસોધરા સિરિમા ચ [યસા નામ સિરિમા ચ (સ્યા. કં.)], અહેસું અગ્ગુપટ્ઠિકા.

૨૬. અટ્ઠાસીતિરતનાનિ, અચ્ચુગ્ગતો મહામુનિ;

ઓભાસેતિ દિસા સબ્બા, ચન્દો તારગણે યથા.

૨૭. ચક્કવત્તિમણી નામ, યથા તપતિ યોજનં;

તથેવ તસ્સ રતનં, સમન્તા ફરતિ યોજનં.

૨૮. નવુતિવસ્સસહસ્સાનિ, આયુ વિજ્જતિ તાવદે;

તાવતા તિટ્ઠમાનો સો, તારેસિ જનતં બહું.

૨૯. તેવિજ્જછળભિઞ્ઞેહિ, બલપ્પત્તેહિ તાદિહિ;

સમાકુલમિદં આસિ, અરહન્તેહિ સાધુહિ.

૩૦. તેપિ સબ્બે અમિતયસા, વિપ્પમુત્તા નિરૂપધી;

ઞાણાલોકં દસ્સયિત્વા, નિબ્બુતા તે મહાયસા.

૩૧. સુમેધો જિનવરો બુદ્ધો, મેધારામમ્હિ નિબ્બુતો;

ધાતુવિત્થારિકં આસિ, તેસુ તેસુ પદેસતોતિ.

સુમેધસ્સ ભગવતો વંસો એકાદસમો.