૧૧. નારદબુદ્ધવંસો

૧. પદુમસ્સ અપરેન, સમ્બુદ્ધો દ્વિપદુત્તમો;

નારદો નામ નામેન, અસમો અપ્પટિપુગ્ગલો.

૨. સો બુદ્ધો ચક્કવત્તિસ્સ, જેટ્ઠો દયિતઓરસો;

આમુક્કમાલાભરણો, ઉય્યાનં ઉપસઙ્કમિ.

૩. તત્થાસિ રુક્ખો યસવિપુલો, અભિરૂપો બ્રહા સુચિ;

તમજ્ઝપત્વા ઉપનિસીદિ, મહાસોણસ્સ હેટ્ઠતો.

૪. તત્થ ઞાણવરુપ્પજ્જિ, અનન્તં વજિરૂપમં;

તેન વિચિનિ સઙ્ખારે, ઉક્કુજ્જમવકુજ્જકં [કુજ્જતં (સ્યા. કં.)].

૫. તત્થ સબ્બકિલેસાનિ, અસેસમભિવાહયિ;

પાપુણી કેવલં બોધિં, બુદ્ધઞાણે ચ ચુદ્દસ.

૬. પાપુણિત્વાન સમ્બોધિં, ધમ્મચક્કં પવત્તયિ;

કોટિસતસહસ્સાનં, પઠમાભિસમયો અહુ.

૭. મહાદોણં નાગરાજં, વિનયન્તો મહામુનિ;

પાટિહેરં તદાકાસિ, દસ્સયન્તો સદેવકે.

૮. તદા દેવમનુસ્સાનં, તમ્હિ ધમ્મપ્પકાસને;

નવુતિકોટિસહસ્સાનિ, તરિંસુ સબ્બસંસયં.

૯. યમ્હિ કાલે મહાવીરો, ઓવદી સકમત્રજં;

અસીતિકોટિસહસ્સાનં, તતિયાભિસમયો અહુ.

૧૦. સન્નિપાતા તયો આસું, નારદસ્સ મહેસિનો;

કોટિસતસહસ્સાનં, પઠમો આસિ સમાગમો.

૧૧. યદા બુદ્ધો બુદ્ધગુણં, સનિદાનં પકાસયિ;

નવુતિકોટિસહસ્સાનિ, સમિંસુ વિમલા તદા.

૧૨. યદા વેરોચનો નાગો, દાનં દદાતિ સત્થુનો;

તદા સમિંસુ જિનપુત્તા, અસીતિસતસહસ્સિયો.

૧૩. અહં તેન સમયેન, જટિલો ઉગ્ગતાપનો;

અન્તલિક્ખચરો આસિં, પઞ્ચાભિઞ્ઞાસુ પારગૂ.

૧૪. તદાપાહં અસમસમં, સસઙ્ઘં સપરિજ્જનં;

અન્નપાનેન તપ્પેત્વા, ચન્દનેનાભિપૂજયિં.

૧૫. સોપિ મં તદા બ્યાકાસિ, નારદો લોકનાયકો;

‘‘અપરિમેય્યિતો કપ્પે, અયં બુદ્ધો ભવિસ્સતિ.

૧૬. ‘‘પધાનં પદહિત્વાન…પે… હેસ્સામ સમ્મુખા ઇમં’’.

૧૭. તસ્સાપિ વચનં સુત્વા, ભિય્યો હાસેત્વ માનસં;

અધિટ્ઠહિં વતં ઉગ્ગં, દસપારમિપૂરિયા.

૧૮. નગરં ધઞ્ઞવતી નામ, સુદેવો નામ ખત્તિયો;

અનોમા નામ જનિકા, નારદસ્સ મહેસિનો.

૧૯. નવવસ્સસહસ્સાનિ, અગારં અજ્ઝ સો વસિ;

જિતો વિજિતાભિરામો, તયો પાસાદમુત્તમા.

૨૦. તિચત્તારીસસહસ્સાનિ, નારિયો સમલઙ્કતા;

વિજિતસેના નામ નારી, નન્દુત્તરો નામ અત્રજો.

૨૧. નિમિત્તે ચતુરો દિસ્વા, પદસા ગમનેન નિક્ખમિ;

સત્તાહં પધાનચારં, અચરી પુરિસુત્તમો [લોકનાયકો (સી. ક.)].

૨૨. બ્રહ્મુના યાચિતો સન્તો, નારદો લોકનાયકો;

વત્તિ ચક્કં મહાવીરો, ધનઞ્ચુય્યાનમુત્તમે.

૨૩. ભદ્દસાલો જિતમિત્તો, અહેસું અગ્ગસાવકા;

વાસેટ્ઠો નામુપટ્ઠાકો, નારદસ્સ મહેસિનો.

૨૪. ઉત્તરા ફગ્ગુની ચેવ, અહેસું અગ્ગસાવિકા;

બોધિ તસ્સ ભગવતો, મહાસોણોતિ વુચ્ચતિ.

૨૫. ઉગ્ગરિન્દો વસભો ચ, અહેસું અગ્ગુપટ્ઠકા;

ઇન્દાવરી ચ વણ્ડી [ઉન્દી (સી.), ગણ્ડી (સ્યા. કં.)] ચ, અહેસું અગ્ગુપટ્ઠિકા.

૨૬. અટ્ઠાસીતિરતનાનિ, અચ્ચુગ્ગતો મહામુનિ;

કઞ્ચનગ્ઘિયસઙ્કાસો, દસસહસ્સી વિરોચતિ.

૨૭. તસ્સ બ્યામપ્પભા કાયા, નિદ્ધાવતિ દિસોદિસં;

નિરન્તરં દિવારત્તિં, યોજનં ફરતે સદા.

૨૮. ન કેચિ તેન સમયેન, સમન્તા યોજને જના;

ઉક્કાપદીપે ઉજ્જાલેન્તિ, બુદ્ધરંસીહિ ઓત્થટા.

૨૯. નવુતિવસ્સસહસ્સાનિ, આયુ વિજ્જતિ તાવદે;

તાવતા તિટ્ઠમાનો સો, તારેસિ જનતં બહું.

૩૦. યથા ઉળૂહિ ગગનં, વિચિત્તં ઉપસોભતિ;

તથેવ સાસનં તસ્સ, અરહન્તેહિ સોભતિ.

૩૧. સંસારસોતં તરણાય, સેસકે પટિપન્નકે;

ધમ્મસેતું દળ્હં કત્વા, નિબ્બુતો સો નરાસભો.

૩૨. સોપિ બુદ્ધો અસમસમો, તેપિ ખીણાસવા અતુલતેજા;

સબ્બં તમન્તરહિતં, નનુ રિત્તા સબ્બસઙ્ખારા.

૩૩. નારદો જિનવસભો, નિબ્બુતો સુદસ્સને પુરે;

તત્થેવસ્સ થૂપવરો, ચતુયોજનમુગ્ગતોતિ.

નારદસ્સ ભગવતો વંસો નવમો.