૧૦. તિપદુમિયત્થેરઅપદાનં

૪૮. ‘‘પદુમુત્તરો નામ જિનો, સબ્બધમ્માન પારગૂ;

દન્તો દન્તપરિવુતો, નગરા નિક્ખમી તદા.

૪૯. ‘‘નગરે હંસવતિયં, અહોસિં માલિકો તદા;

યં તત્થ ઉત્તમં તોણિ, પદ્મપુપ્ફાનિ [ઉત્તમં પુપ્ફં, તીણિ પુપ્ફાનિ (સી.)] અગ્ગહિં.

૫૦. ‘‘અદ્દસં વિરજં બુદ્ધં, પટિમગ્ગન્તરાપણે;

સહ [સોહં (સી.)] દિસ્વાન સમ્બુદ્ધં, એવં ચિન્તેસહં તદા.

૫૧. ‘‘કિં મે ઇમેહિ પુપ્ફેહિ, રઞ્ઞો ઉપનિતેહિ મે;

ગામં વા ગામખેત્તં વા, સહસ્સં વા લભેય્યહં.

૫૨. ‘‘અદન્તદમનં વીરં, સબ્બસત્તસુખાવહં;

લોકનાથં પૂજયિત્વા, લચ્છામિ અમતં ધનં.

૫૩. ‘‘એવાહં ચિન્તયિત્વાન, સકં ચિત્તં પસાદયિં;

તીણિ લોહિતકે ગય્હ, આકાસે ઉક્ખિપિં તદા.

૫૪. ‘‘મયા ઉક્ખિત્તમત્તમ્હિ, આકાસે પત્થરિંસુ તે;

ધારિંસુ મત્થકે તત્થ, ઉદ્ધંવણ્ટા અધોમુખા.

૫૫. ‘‘યે કેચિ મનુજા દિસ્વા, ઉક્કુટ્ઠિં સમ્પવત્તયું;

દેવતા અન્તલિક્ખમ્હિ, સાધુકારં પવત્તયું.

૫૬. ‘‘અચ્છેરં લોકે ઉપ્પન્નં, બુદ્ધસેટ્ઠસ્સ વાહસા;

સબ્બે ધમ્મં સુણિસ્સામ, પુપ્ફાનં વાહસા મયં.

૫૭. ‘‘પદુમુત્તરો લોકવિદૂ, આહુતીનં પટિગ્ગહો;

વીથિયઞ્હિ ઠિતો સન્તો, ઇમા ગાથા અભાસથ.

૫૮. ‘‘‘યો સો બુદ્ધં અપૂજેસિ, રત્તપદ્મેહિ [રત્તપદુમેહિ (સી. સ્યા.)] માણવો;

તમહં કિત્તયિસ્સામિ, સુણાથ મમ ભાસતો.

૫૯. ‘‘‘તિંસકપ્પસહસ્સાનિ, દેવલોકે રમિસ્સતિ;

તિંસકપ્પાનિ [તિંસક્ખત્તુઞ્ચ (સ્યા.)] દેવિન્દો, દેવરજ્જં કરિસ્સતિ.

૬૦. ‘‘‘મહાવિત્થારિકં નામ, બ્યમ્હં હેસ્સતિ તાવદે;

તિયોજનસતુબ્બિદ્ધં, દિયડ્ઢસતવિત્થતં.

૬૧. ‘‘‘ચત્તારિસતસહસ્સાનિ, નિય્યૂહા ચ સુમાપિતા;

કૂટાગારવરૂપેતા, મહાસયનમણ્ડિતા.

૬૨. ‘‘‘કોટિસતસહસ્સિયો, પરિવારેસ્સન્તિ અચ્છરા;

કુસલા નચ્ચગીતસ્સ, વાદિતેપિ પદક્ખિણા.

૬૩. ‘‘‘એતાદિસે બ્યમ્હવરે, નારીગણસમાકુલે;

વસ્સિસ્સતિ પુપ્ફવસ્સો, દિબ્બો [પદ (ક.)] લોહિતકો સદા.

૬૪. ‘‘‘ભિત્તિખીલે નાગદન્તે, દ્વારબાહાય તોરણે;

ચક્કમત્તા લોહિતકા, ઓલમ્બિસ્સન્તિ તાવદે.

૬૫. ‘‘‘પત્તેન પત્તસઞ્છન્ને, અન્તોબ્યમ્હવરે ઇમં;

અત્થરિત્વા પારુપિત્વા, તુવટ્ટિસ્સન્તિ તાવદે.

૬૬. ‘‘‘ભવનં પરિવારેત્વા, સમન્તા સતયોજને;

તેપિ પદ્મા [તે વિસુદ્ધા (સી. સ્યા.)] લોહિતકા, દિબ્બગન્ધં પવાયરે.

૬૭. ‘‘‘પઞ્ચસત્તતિક્ખત્તુઞ્ચ, ચક્કવત્તી ભવિસ્સતિ;

પદેસરજ્જં વિપુલં, ગણનાતો અસઙ્ખિયં.

૬૮. ‘‘‘સમ્પત્તિયો દુવે ભુત્વા, અનીતિ અનુપદ્દવો;

સમ્પત્તે પરિયોસાને, નિબ્બાનં પાપુણિસ્સતિ’ [ફસ્સયિસ્સતિ (સી.), પસ્સયિસ્સતિ (ક.)].

૬૯. ‘‘સુદિટ્ઠો વત મે બુદ્ધો, વાણિજ્જં સુપયોજિતં;

પદ્માનિ તીણિ પૂજેત્વા, અનુભોસિં તિસમ્પદા [અનુભૂયન્તિ સમ્પદા (ક.)].

૭૦. ‘‘અજ્જ મે ધમ્મપ્પત્તસ્સ, વિપ્પમુત્તસ્સ સબ્બસો;

સુપુપ્ફિતં લોહિતકં, ધારયિસ્સતિ મત્થકે.

૭૧. ‘‘મમ કમ્મં કથેન્તસ્સ, પદુમુત્તરસત્થુનો;

સતપાણસહસ્સાનં, ધમ્માભિસમયો અહુ.

૭૨. ‘‘સતસહસ્સિતો કપ્પે, યં બુદ્ધમભિપૂજયિં;

દુગ્ગતિં નાભિજાનામિ, તિપદુમાનિદં ફલં.

૭૩. ‘‘કિલેસા ઝાપિતા મય્હં, ભવા સબ્બે સમૂહતા;

સબ્બાસવા પરિક્ખીણા, નત્થિ દાનિ પુનબ્ભવો.

૭૪. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા તિપદુમિયો થેરો ઇમા ગાથાયો અભાસિત્થાતિ.

તિપદુમિયત્થેરસ્સાપદાનં દસમં.

નાગસમાલવગ્ગો અટ્ઠમો.