૧. તિણમુટ્ઠિદાયકત્થેરઅપદાનં

૧. ‘‘હિમવન્તસ્સાવિદૂરે, લમ્બકો નામ પબ્બતો;

તત્થેવ તિસ્સો [તત્થોપતિસ્સો (સી. પી. ક.)] સમ્બુદ્ધો, અબ્ભોકાસમ્હિ ચઙ્કમિ.

૨. ‘‘મિગલુદ્દો પુરે આસિં, અરઞ્ઞે કાનને અહં;

દિસ્વાન તં દેવદેવં, તિણમુટ્ઠિમદાસહં.

૩. ‘‘નિસીદનત્થં બુદ્ધસ્સ, દત્વા ચિત્તં પસાદયિં;

સમ્બુદ્ધં અભિવાદેત્વા, પક્કામિં [પક્કમિં (ક.)] ઉત્તરામુખો.

૪. ‘‘અચિરં ગતમત્તસ્સ [ગતમત્તં મં (સી. સ્યા.)], મિગરાજા અપોથયિ [અહેઠયિ (સી. સ્યા. પી.)];

સીહેન પોથિતો [પાતિતો (સી. પી.), ઘાટિતો (સ્યા.)] સન્તો, તત્થ કાલઙ્કતો અહં.

૫. ‘‘આસન્ને મે કતં કમ્મં, બુદ્ધસેટ્ઠે અનાસવે;

સુમુત્તો સરવેગોવ, દેવલોકમગચ્છહં.

૬. ‘‘યૂપો તત્થ સુભો આસિ, પુઞ્ઞકમ્માભિનિમ્મિતો;

સહસ્સકણ્ડો સતભેણ્ડુ, ધજાલુ હરિતામયો.

૭. ‘‘પભા નિદ્ધાવતે તસ્સ, સતરંસીવ ઉગ્ગતો;

આકિણ્ણો દેવકઞ્ઞાહિ, આમોદિં કામકામિહં.

૮. ‘‘દેવલોકા ચવિત્વાન, સુક્કમૂલેન ચોદિતો;

આગન્ત્વાન મનુસ્સત્તં, પત્તોમ્હિ આસવક્ખયં.

૯. ‘‘ચતુન્નવુતિતો કપ્પે, નિસીદનમદાસહં;

દુગ્ગતિં નાભિજાનામિ, તિણમુટ્ઠે ઇદં ફલં.

૧૦. ‘‘કિલેસા ઝાપિતા મય્હં, ભવા સબ્બે સમૂહતા;

નાગોવ બન્ધનં છેત્વા, વિહરામિ અનાસવો.

૧૧. ‘‘સ્વાગતં વત મે આસિ, મમ બુદ્ધસ્સ સન્તિકે;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૧૨. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા તિણમુટ્ઠિદાયકો થેરો ઇમા ગાથાયો

અભાસિત્થાતિ.

તિણમુટ્ઠિદાયકત્થેરસ્સાપદાનં પઠમં.