૬. અજ્જુનપુપ્ફિયત્થેરઅપદાનં

૨૮. ‘‘ચન્દભાગાનદીતીરે, અહોસિં કિન્નરો તદા;

અદ્દસં વિરજં બુદ્ધં, સયમ્ભું અપરાજિતં.

૨૯. ‘‘પસન્નચિત્તો સુમનો, વેદજાતો કતઞ્જલી;

ગહેત્વા અજ્જુનં પુપ્ફં, સયમ્ભું અભિપૂજયિં.

૩૦. ‘‘તેન કમ્મેન સુકતેન, ચેતનાપણિધીહિ ચ;

જહિત્વા કિન્નરં દેહં, તાવતિંસમગચ્છહં.

૩૧. ‘‘છત્તિંસક્ખત્તું દેવિન્દો, દેવરજ્જમકારયિં;

દસક્ખત્તું ચક્કવત્તી, મહારજ્જમકારયિં.

૩૨. ‘‘પદેસરજ્જં વિપુલં, ગણનાતો અસઙ્ખિયં;

સુખેત્તે વપ્પિતં બીજં, સયમ્ભુમ્હિ અહો મમ [અહોસિ મે (સ્યા.)].

૩૩. ‘‘કુસલં વિજ્જતે મય્હં, પબ્બજિં અનગારિયં;

પૂજારહો અહં અજ્જ, સક્યપુત્તસ્સ સાસને.

૩૪. ‘‘કિલેસા ઝાપિતા મય્હં…પે… વિહરામિ અનાસવો.

૩૫. ‘‘સ્વાગતં વત મે આસિ…પે… કતં બુદ્ધસ્સ સાસનં.

૩૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અજ્જુનપુપ્ફિયો થેરો ઇમા ગાથાયો

અભાસિત્થાતિ.

અજ્જુનપુપ્ફિયત્થેરસ્સાપદાનં છટ્ઠં.