૧. કુરઞ્ચિયફલદાયકત્થેરઅપદાનં

૧. ‘‘મિગલુદ્દો પુરે આસિં, વિપિને વિચરં અહં;

અદ્દસં વિરજં બુદ્ધં, સબ્બધમ્માન પારગું.

૨. ‘‘કુરઞ્ચિયફલં ગય્હ, બુદ્ધસેટ્ઠસ્સદાસહં;

પુઞ્ઞક્ખેત્તસ્સ તાદિનો, પસન્નો સેહિ પાણિભિ.

૩. ‘‘એકતિંસે ઇતો કપ્પે, યં ફલં અદદિં તદા;

દુગ્ગતિં નાભિજાનામિ, ફલદાનસ્સિદં ફલં.

૪. ‘‘કિલેસા ઝાપિતા મય્હં, ભવા સબ્બે સમૂહતા;

નાગોવ બન્ધનં છેત્વા, વિહરામિ અનાસવો.

૫. ‘‘સ્વાગતં વત મે આસિ, બુદ્ધસેટ્ઠસ્સ સન્તિકે;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૬. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા કુરઞ્ચિયફલદાયકો થેરો ઇમા

ગાથાયો અભાસિત્થાતિ.

કુરઞ્ચિયફલદાયકત્થેરસ્સાપદાનં પઠમં.