૭. અજેલિફલદાયકત્થેરઅપદાનં

૭૪. ‘‘અજ્જુનો [અજિનો (સ્યા.)] નામ સમ્બુદ્ધો, હિમવન્તે વસી તદા;

ચરણેન ચ સમ્પન્નો, સમાધિકુસલો મુનિ.

૭૫. ‘‘કુમ્ભમત્તં ગહેત્વાન, અજેલિં [અઞ્જલિં (સ્યા.), અજેલં (પી.)] જીવજીવકં;

છત્તપણ્ણં ગહેત્વાન, અદાસિં સત્થુનો અહં.

૭૬. ‘‘ચતુન્નવુતિતો કપ્પે, યં ફલં અદદિં તદા;

દુગ્ગતિં નાભિજાનામિ, ફલદાનસ્સિદં ફલં.

૭૭. ‘‘કિલેસા ઝાપિતા મય્હં…પે… વિહરામિ અનાસવો.

૭૮. ‘‘સ્વાગતં વત મે આસિ…પે… કતં બુદ્ધસ્સ સાસનં.

૭૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અજેલિફલદાયકો થેરો ઇમા

ગાથાયો અભાસિત્થાતિ.

અજેલિફલદાયકત્થેરસ્સાપદાનં સત્તમં.