૮. પુલિનથૂપિયત્થેરઅપદાનં

૫૭. ‘‘હિમવન્તસ્સાવિદૂરે, યમકો નામ પબ્બતો;

અસ્સમો સુકતો મય્હં, પણ્ણસાલા સુમાપિતા.

૫૮. ‘‘નારદો નામ નામેન, જટિલો ઉગ્ગતાપનો;

ચતુદ્દસસહસ્સાનિ, સિસ્સા પરિચરન્તિ મં.

૫૯. ‘‘પટિસલ્લીનકો સન્તો, એવં ચિન્તેસહં તદા;

‘સબ્બો જનો મં પૂજેતિ, નાહં પૂજેમિ કિઞ્ચનં.

૬૦. ‘‘‘ન મે ઓવાદકો અત્થિ, વત્તા કોચિ ન વિજ્જતિ;

અનાચરિયુપજ્ઝાયો, વને વાસં ઉપેમહં.

૬૧. ‘‘‘ઉપાસમાનો યમહં, ગરુચિત્તં ઉપટ્ઠહે;

સો મે આચરિયો નત્થિ, વનવાસો નિરત્થકો.

૬૨. ‘‘‘આયાગં મે ગવેસિસ્સં, ગરું ભાવનિયં તથા;

સાવસ્સયો વસિસ્સામિ, ન કોચિ ગરહિસ્સતિ’.

૬૩. ‘‘ઉત્તાનકૂલા નદિકા, સુપતિત્થા મનોરમા;

સંસુદ્ધપુલિનાકિણ્ણા, અવિદૂરે મમસ્સમં.

૬૪. ‘‘નદિં અમરિકં નામ, ઉપગન્ત્વાનહં તદા;

સંવડ્ઢયિત્વા પુલિનં, અકં પુલિનચેતિયં.

૬૫. ‘‘યે તે અહેસું સમ્બુદ્ધા, ભવન્તકરણા મુની;

તેસં એતાદિસો થૂપો, તં નિમિત્તં કરોમહં.

૬૬. ‘‘કરિત્વા પુલિનં [પુળિને (સી. સ્યા. પી.)] થૂપં, સોવણ્ણં માપયિં અહં;

સોણ્ણકિઙ્કણિપુપ્ફાનિ, સહસ્સે તીણિ પૂજયિં.

૬૭. ‘‘સાયપાતં નમસ્સામિ, વેદજાતો કતઞ્જલી;

સમ્મુખા વિય સમ્બુદ્ધં, વન્દિં પુલિનચેતિયં.

૬૮. ‘‘યદા કિલેસા જાયન્તિ, વિતક્કા ગેહનિસ્સિતા;

સરામિ સુકતં થૂપં, પચ્ચવેક્ખામિ તાવદે.

૬૯. ‘‘ઉપનિસ્સાય વિહરં, સત્થવાહં વિનાયકં;

કિલેસે સંવસેય્યાસિ, ન યુત્તં તવ મારિસ.

૭૦. ‘‘સહ આવજ્જિતે થૂપે, ગારવં હોતિ મે તદા;

કુવિતક્કે વિનોદેસિં, નાગો તુત્તટ્ટિતો યથા.

૭૧. ‘‘એવં વિહરમાનં મં, મચ્ચુરાજાભિમદ્દથ;

તત્થ કાલઙ્કતો સન્તો, બ્રહ્મલોકમગચ્છહં.

૭૨. ‘‘યાવતાયું વસિત્વાન, તિદિવે [તિદસે (સી. પી.)] ઉપપજ્જહં;

અસીતિક્ખત્તું દેવિન્દો, દેવરજ્જમકારયિં.

૭૩. ‘‘સતાનં તીણિક્ખત્તુઞ્ચ, ચક્કવત્તી અહોસહં;

પદેસરજ્જં વિપુલં, ગણનાતો અસઙ્ખિયં.

૭૪. ‘‘સોણ્ણકિઙ્કણિપુપ્ફાનં [તેસં કિઙ્કણિપુપ્ફાનં (સી.)], વિપાકં અનુભોમહં;

ધાતીસતસહસ્સાનિ, પરિવારેન્તિ મં [મે (ક.)] ભવે.

૭૫. ‘‘થૂપસ્સ પરિચિણ્ણત્તા, રજોજલ્લં ન લિમ્પતિ;

ગત્તે સેદા ન મુચ્ચન્તિ, સુપ્પભાસો ભવામહં.

૭૬. ‘‘અહો મે સુકતો થૂપો, સુદિટ્ઠામરિકા નદી;

થૂપં કત્વાન પુલિનં, પત્તોમ્હિ અચલં પદં.

૭૭. ‘‘કુસલં કત્તુકામેન, જન્તુના સારગાહિના;

નત્થિ ખેત્તં અખેત્તં વા, પટિપત્તીવ સાધકા [સારિકા (પી.), સારકા (સ્યા.), સારતા (ક.)].

૭૮. ‘‘યથાપિ બલવા પોસો, અણ્ણવં તરિતુસ્સહે;

પરિત્તં કટ્ઠમાદાય, પક્ખન્દેય્ય મહાસરં.

૭૯. ‘‘ઇમાહં કટ્ઠં નિસ્સાય, તરિસ્સામિ મહોદધિં;

ઉસ્સાહેન વીરિયેન, તરેય્ય ઉદધિં નરો.

૮૦. ‘‘તથેવ મે કતં કમ્મં, પરિત્તં થોકકઞ્ચ યં;

તં કમ્મં ઉપનિસ્સાય, સંસારં સમતિક્કમિં.

૮૧. ‘‘પચ્છિમે ભવે સમ્પત્તે, સુક્કમૂલેન ચોદિતો;

સાવત્થિયં પુરે જાતો, મહાસાલે સુઅડ્ઢકે.

૮૨. ‘‘સદ્ધા માતા પિતા મય્હં, બુદ્ધસ્સ સરણં ગતા;

ઉભો દિટ્ઠપદા એતે, અનુવત્તન્તિ સાસનં.

૮૩. ‘‘બોધિપપટિકં ગય્હ, સોણ્ણથૂપમકારયું;

સાયપાતં [સાયં પાતં (સ્યા. ક.)] નમસ્સન્તિ, સક્યપુત્તસ્સ સમ્મુખા.

૮૪. ‘‘ઉપોસથમ્હિ દિવસે, સોણ્ણથૂપં વિનીહરું;

બુદ્ધસ્સ વણ્ણં કિત્તેન્તા, તિયામં વીતિનામયું.

૮૫. ‘‘સહ દિસ્વાનહં [પસાદેત્વાનહં (ક.)] થૂપં, સરિં પુલિનચેતિયં;

એકાસને નિસીદિત્વા, અરહત્તમપાપુણિં.

દ્વાવીસતિમં ભાણવારં.

૮૬. ‘‘ગવેસમાનો તં વીરં, ધમ્મસેનાપતિદ્દસં;

અગારા નિક્ખમિત્વાન, પબ્બજિં તસ્સ સન્તિકે.

૮૭. ‘‘જાતિયા સત્તવસ્સેન, અરહત્તમપાપુણિં;

ઉપસમ્પાદયી બુદ્ધો, ગુણમઞ્ઞાય ચક્ખુમા.

૮૮. ‘‘દારકેનેવ સન્તેન, કિરિયં નિટ્ઠિતં મયા;

કતં મે કરણીયજ્જ, સક્યપુત્તસ્સ સાસને.

૮૯. ‘‘સબ્બવેરભયાતીતો, સબ્બસઙ્ગાતિગો [સબ્બસઙ્કાતિતો (ક.)] ઇસિ;

સાવકો તે મહાવીર, સોણ્ણથૂપસ્સિદં ફલં.

૯૦. ‘‘કિલેસા ઝાપિતા મય્હં…પે… વિહરામિ અનાસવો.

૯૧. ‘‘સ્વાગતં વત મે આસિ…પે… કતં બુદ્ધસ્સ સાસનં.

૯૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પુલિનથૂપિયો થેરો ઇમા ગાથાયો

અભાસિત્થાતિ.

પુલિનથૂપિયત્થેરસ્સાપદાનં અટ્ઠમં.