૧૦. પિયાલફલદાયકત્થેરઅપદાનં

૧૦૪. ‘‘મિગલુદ્દો પુરે આસિં, વિપિને વિચરં તદા;

અદ્દસં વિરજં બુદ્ધં, સબ્બધમ્માન પારગું.

૧૦૫. ‘‘પિયાલફલમાદાય, બુદ્ધસેટ્ઠસ્સદાસહં;

પુઞ્ઞક્ખેત્તસ્સ વીરસ્સ, પસન્નો સેહિ પાણિભિ.

૧૦૬. ‘‘એકતિંસે ઇતો કપ્પે, યં ફલં અદદિં તદા;

દુગ્ગતિં નાભિજાનામિ, ફલદાનસ્સિદં ફલં.

૧૦૭. ‘‘કિલેસા ઝાપિતા મય્હં…પે… વિહરામિ અનાસવો.

૧૦૮. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૦૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પિયાલફલદાયકો થેરો ઇમા

ગાથાયો અભાસિત્થાતિ.

પિયાલફલદાયકત્થેરસ્સાપદાનં દસમં.

કિઙ્કણિપુપ્ફવગ્ગો પઞ્ઞાસમો.

તસ્સુદ્દાનં –

કિઙ્કણી પંસુકૂલઞ્ચ, કોરણ્ડમથ કિંસુકં;

ઉપડ્ઢદુસ્સી ઘતદો, ઉદકં થૂપકારકો.

નળકારી ચ નવમો, પિયાલફલદાયકો;

સતમેકઞ્ચ ગાથાનં, નવકઞ્ચ તદુત્તરિ.

અથ વગ્ગુદ્દાનં –

મેત્તેય્યવગ્ગો ભદ્દાલિ, સકિંસમ્મજ્જકોપિ ચ;

એકવિહારી વિભીતકી, જગતી સાલપુપ્ફિયો.

નળાગારં પંસુકૂલં, કિઙ્કણિપુપ્ફિયો તથા;

અસીતિ દ્વે ચ ગાથાયો, ચતુદ્દસસતાનિ ચ.

મેત્તેય્યવગ્ગદસકં.