૯. સયંપટિભાનિયત્થેરઅપદાનં

૪૫. ‘‘કકુધં વિલસન્તંવ, દેવદેવં નરાસભં;

રથિયં પટિપજ્જન્તં, કો દિસ્વા ન પસીદતિ.

૪૬. ‘‘તમન્ધકારં નાસેત્વા, સન્તારેત્વા બહું જનં;

ઞાણાલોકેન જોતન્તં, કો દિસ્વા ન પસીદતિ.

૪૭. ‘‘વસીસતસહસ્સેહિ, નીયન્તં લોકનાયકં;

ઉદ્ધરન્તં બહૂ સત્તે, કો દિસ્વા ન પસીદતિ.

૪૮. ‘‘આહનન્તં [આહનિત્વા (સ્યા. ક.)] ધમ્મભેરિં, મદ્દન્તં તિત્થિયે ગણે;

સીહનાદં વિનદન્તં, કો દિસ્વા ન પસીદતિ.

૪૯. ‘‘યાવતા બ્રહ્મલોકતો, આગન્ત્વાન સબ્રહ્મકા;

પુચ્છન્તિ નિપુણે પઞ્હે, કો દિસ્વા ન પસીદતિ.

૫૦. ‘‘યસ્સઞ્જલિં કરિત્વાન, આયાચન્તિ સદેવકા;

તેન પુઞ્ઞં અનુભોન્તિ, કો દિસ્વા ન પસીદતિ.

૫૧. ‘‘સબ્બે જના સમાગન્ત્વા, સમ્પવારેન્તિ ચક્ખુમં;

ન વિકમ્પતિ અજ્ઝિટ્ઠો, કો દિસ્વા ન પસીદતિ.

૫૨. ‘‘નગરં પવિસતો યસ્સ, રવન્તિ ભેરિયો બહૂ;

વિનદન્તિ ગજા મત્તા, કો દિસ્વા ન પસીદતિ.

૫૩. ‘‘વીથિયા [રથિયા (સી.)] ગચ્છતો યસ્સ, સબ્બાભા જોતતે સદા;

અબ્ભુન્નતા સમા હોન્તિ, કો દિસ્વા ન પસીદતિ.

૫૪. ‘‘બ્યાહરન્તસ્સ બુદ્ધસ્સ, ચક્કવાળમ્પિ સુય્યતિ;

સબ્બે સત્તે વિઞ્ઞાપેતિ, કો દિસ્વા ન પસીદતિ.

૫૫. ‘‘સતસહસ્સિતો કપ્પે, યં બુદ્ધમભિકિત્તયિં;

દુગ્ગતિં નાભિજાનામિ, કિત્તનાય ઇદં ફલં.

૫૬. ‘‘કિલેસા ઝાપિતા મય્હં…પે… વિહરામિ અનાસવો.

૫૭. ‘‘સ્વાગતં વત મે આસિ…પે… કતં બુદ્ધસ્સ સાસનં.

૫૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સયંપટિભાનિયો થેરો ઇમા ગાથાયો

અભાસિત્થાતિ.

સયંપટિભાનિયત્થેરસ્સાપદાનં નવમં.