૧. સાલકુસુમિયત્થેરઅપદાનં

૧. ‘‘પરિનિબ્બુતે ભગવતિ, જલજુત્તમનામકે;

આરોપિતમ્હિ ચિતકે, સાલપુપ્ફમપૂજયિં.

૨. ‘‘સતસહસ્સિતો કપ્પે, યં પુપ્ફમભિરોપયિં [પુપ્ફમભિપુજયિં (સ્યા.)];

દુગ્ગતિં નાભિજાનામિ, ચિતપૂજાયિદં [બુદ્ધપૂજાયિદં (સ્યા.)] ફલં.

૩. ‘‘કિલેસા ઝાપિતા મય્હં, ભવા સબ્બે સમૂહતા;

નાગોવ બન્ધનં છેત્વા, વિહરામિ અનાસવો.

૪. ‘‘સ્વાગતં વત મે આસિ, મમ બુદ્ધસ્સ સન્તિકે;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૫. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા સાલકુસુમિયો થેરો ઇમા ગાથાયો

અભાસિત્થાતિ.

સાલકુસુમિયત્થેરસ્સાપદાનં પઠમં.