૮. પાદપીઠિયત્થેરઅપદાનં

૫૦. ‘‘સુમેધો નામ સમ્બુદ્ધો, અગ્ગો કારુણિકો મુનિ;

તારયિત્વા બહૂ સત્તે, નિબ્બુતો સો મહાયસો.

૫૧. ‘‘સીહાસનસ્સ સામન્તા, સુમેધસ્સ મહેસિનો;

પસન્નચિત્તો સુમનો, પાદપીઠમકારયિં.

૫૨. ‘‘કત્વાન કુસલં કમ્મં, સુખપાકં સુખુદ્રયં;

પુઞ્ઞકમ્મેન સંયુત્તો, તાવતિંસમગચ્છહં.

૫૩. ‘‘તત્થ મે વસમાનસ્સ, પુઞ્ઞકમ્મસમઙ્ગિનો;

પદાનિ ઉદ્ધરન્તસ્સ, સોણ્ણપીઠા ભવન્તિ મે.

૫૪. ‘‘લાભા તેસં સુલદ્ધં વો, યે લભન્તિ ઉપસ્સુતિં;

નિબ્બુતે કારં કત્વાન, લભન્તિ વિપુલં સુખં.

૫૫. ‘‘મયાપિ સુકતં કમ્મં, વાણિજ્જં સુપ્પયોજિતં;

પાદપીઠં કરિત્વાન, સોણ્ણપીઠં લભામહં.

૫૬. ‘‘યં યં દિસં પક્કમામિ, કેનચિ કિચ્ચયેનહં [પચ્ચયેનહં (સી. પી.)];

સોણ્ણપીઠે અક્કમામિ [સોણ્ણપીઠેન કમામિ (ક.)], પુઞ્ઞકમ્મસ્સિદં ફલં.

૫૭. ‘‘તિંસકપ્પસહસ્સમ્હિ, યં કમ્મમકરિં તદા;

દુગ્ગતિં નાભિજાનામિ, પાદપીઠસ્સિદં ફલં.

૫૮. ‘‘કિલેસા ઝાપિતા મય્હં…પે… વિહરામિ અનાસવો.

૫૯. ‘‘સ્વાગતં વત મે આસિ…પે… કતં બુદ્ધસ્સ સાસનં.

૬૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પાદપીઠિયો થેરો ઇમા ગાથાયો

અભાસિત્થાતિ.

પાદપીઠિયત્થેરસ્સાપદાનં અટ્ઠમં.