૧. એકવિહારિકત્થેરઅપદાનં

૧. ‘‘ઇમમ્હિ ભદ્દકે કપ્પે, બ્રહ્મબન્ધુ મહાયસો;

કસ્સપો નામ ગોત્તેન, ઉપ્પજ્જિ વદતં વરો.

૨. ‘‘નિપ્પપઞ્ચો નિરાલમ્બો, આકાસસમમાનસો;

સુઞ્ઞતાબહુલો તાદી, અનિમિત્તરતો વસી.

૩. ‘‘અસઙ્ગચિત્તો નિક્લેસો [નિલ્લેપો (સ્યા. ક.)], અસંસટ્ઠો કુલે ગણે;

મહાકારુણિકો વીરો, વિનયોપાયકોવિદો.

૪. ‘‘ઉય્યુત્તો પરકિચ્ચેસુ, વિનયન્તો સદેવકે;

નિબ્બાનગમનં મગ્ગં, ગતિં પઙ્કવિસોસનં.

૫. ‘‘અમતં પરમસ્સાદં, જરામચ્ચુનિવારણં;

મહાપરિસમજ્ઝે સો, નિસિન્નો લોકતારકો.

૬. ‘‘કરવીકરુતો [કરવીકરુદો (સ્યા. પી. ક.)] નાથો, બ્રહ્મઘોસો તથાગતો;

ઉદ્ધરન્તો મહાદુગ્ગા, વિપ્પનટ્ઠે અનાયકે.

૭. ‘‘દેસેન્તો વિરજં ધમ્મં, દિટ્ઠો મે લોકનાયકો;

તસ્સ ધમ્મં સુણિત્વાન, પબ્બજિં અનગારિયં.

૮. ‘‘પબ્બજિત્વા તદાપાહં, ચિન્તેન્તો જિનસાસનં;

એકકોવ વને રમ્મે, વસિં સંસગ્ગપીળિતો.

૯. ‘‘સક્કાયવૂપકાસો મે, હેતુભૂતો મમાભવી [મમાગમી (સ્યા. પી.)];

મનસો વૂપકાસસ્સ, સંસગ્ગભયદસ્સિનો.

૧૦. ‘‘કિલેસા ઝાપિતા મય્હં, ભવા સબ્બે સમૂહતા;

નાગોવ બન્ધનં છેત્વા, વિહરામિ અનાસવો.

૧૧. ‘‘સ્વાગતં વત મે આસિ, મમ બુદ્ધસ્સ સન્તિકે;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૧૨. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા એકવિહારિકો થેરો ઇમા ગાથાયો

અભાસિત્થાતિ.

એકવિહારિકત્થેરસ્સાપદાનં પઠમં.