૯. સોવણ્ણકિઙ્કણિયત્થેરઅપદાનં

૧૪૦. ‘‘સદ્ધાય અભિનિક્ખમ્મ, પબ્બજિં અનગારિયં;

વાકચીરધરો આસિં, તપોકમ્મમપસ્સિતો.

૧૪૧. ‘‘અત્થદસ્સી તુ ભગવા, લોકજેટ્ઠો નરાસભો;

ઉપ્પજ્જિ તમ્હિ સમયે, તારયન્તો મહાજનં.

૧૪૨. ‘‘બલઞ્ચ વત મે ખીણં, બ્યાધિના પરમેન તં;

બુદ્ધસેટ્ઠં સરિત્વાન, પુલિને થૂપમુત્તમં.

૧૪૩. ‘‘કરિત્વા હટ્ઠચિત્તોહં, સહત્થેન [પસાદેન (ક.)] સમોકિરિં;

સોણ્ણકિઙ્કણિપુપ્ફાનિ, ઉદગ્ગમનસો અહં.

૧૪૪. ‘‘સમ્મુખા વિય સમ્બુદ્ધં, થૂપં પરિચરિં અહં;

તેન ચેતોપસાદેન, અત્થદસ્સિસ્સ તાદિનો.

૧૪૫. ‘‘દેવલોકં ગતો સન્તો, લભામિ વિપુલં સુખં;

સુવણ્ણવણ્ણો તત્થાસિં, બુદ્ધપૂજાયિદં ફલં.

૧૪૬. ‘‘અસીતિકોટિયો મય્હં, નારિયો સમલઙ્કતા;

સદા મય્હં ઉપટ્ઠન્તિ, બુદ્ધપૂજાયિદં ફલં.

૧૪૭. ‘‘સટ્ઠિતુરિયસહસ્સાનિ [સટ્ઠિતૂરિય… (ક.)], ભેરિયો પણવાનિ ચ;

સઙ્ખા ચ ડિણ્ડિમા તત્થ, વગ્ગૂ વજ્જન્તિ [નદન્તિ (સી.), વદન્તિ (પી.)] દુન્દુભી.

૧૪૮. ‘‘ચુલ્લાસીતિસહસ્સાનિ, હત્થિનો સમલઙ્કતા;

તિધાપભિન્નમાતઙ્ગા, કુઞ્જરા સટ્ઠિહાયના.

૧૪૯. ‘‘હેમજાલાભિસઞ્છન્ના, ઉપટ્ઠાનં કરોન્તિ મે;

બલકાયે ગજે ચેવ, ઊનતા મે ન વિજ્જતિ.

૧૫૦. ‘‘સોણ્ણકિઙ્કણિપુપ્ફાનં, વિપાકં અનુભોમહં;

અટ્ઠપઞ્ઞાસક્ખત્તુઞ્ચ, દેવરજ્જમકારયિં.

૧૫૧. ‘‘એકસત્તતિક્ખત્તુઞ્ચ, ચક્કવત્તી અહોસહં;

પથબ્યા રજ્જં એકસતં, મહિયા કારયિં અહં.

૧૫૨. ‘‘સો દાનિ અમતં પત્તો, અસઙ્ખતં સુદુદ્દસં [ગમ્ભીરં દુદ્દસં પદં (સ્યા.)];

સંયોજનપરિક્ખીણો, નત્થિ દાનિ પુનબ્ભવો.

૧૫૩. ‘‘અટ્ઠારસે કપ્પસતે, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૧૫૪. ‘‘કિલેસા ઝાપિતા મય્હં…પે… વિહરામિ અનાસવો.

૧૫૫. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૫૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા સોવણ્ણકિઙ્કણિયો થેરો ઇમા

ગાથાયો અભાસિત્થાતિ.

સોવણ્ણકિઙ્કણિયત્થેરસ્સાપદાનં નવમં.