૭. એકધમ્મસ્સવનિયત્થેરઅપદાનં

૮૮. ‘‘પદુમુત્તરો નામ જિનો, સબ્બધમ્માન પારગૂ;

ચતુસચ્ચં પકાસેન્તો, સન્તારેસિ બહું જનં.

૮૯. ‘‘અહં તેન સમયેન, જટિલો ઉગ્ગતાપનો;

ધુનન્તો વાકચીરાનિ, ગચ્છામિ અમ્બરે તદા.

૯૦. ‘‘બુદ્ધસેટ્ઠસ્સ ઉપરિ, ગન્તું ન વિસહામહં;

પક્ખીવ સેલમાસજ્જ, ગમનં ન લભામહં.

૯૧. ‘‘ઉદકે વોક્કમિત્વાન, એવં ગચ્છામિ અમ્બરે;

ન મે ઇદં ભૂતપુબ્બં, ઇરિયાપથવિકોપનં.

૯૨. ‘‘હન્દ મેતં ગવેસિસ્સં, અપ્પેવત્થં લભેય્યહં;

ઓરોહન્તો અન્તલિક્ખા, સદ્દમસ્સોસિ સત્થુનો.

૯૩. ‘‘સરેન રજનીયેન, સવનીયેન વગ્ગુના;

અનિચ્ચતં કથેન્તસ્સ, તઞ્ઞેવ ઉગ્ગહિં તદા;

અનિચ્ચસઞ્ઞમુગ્ગય્હ, અગમાસિં મમસ્સમં.

૯૪. ‘‘યાવતાયું વસિત્વાન, તત્થ કાલઙ્કતો અહં;

ચરિમે વત્તમાનમ્હિ, સદ્ધમ્મસ્સવનં સરિં.

૯૫. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૯૬. ‘‘તિંસકપ્પસહસ્સાનિ, દેવલોકે રમિં અહં;

એકપઞ્ઞાસક્ખત્તુઞ્ચ, દેવરજ્જમકારયિં.

૯૭. ‘‘એકવીસતિક્ખત્તુઞ્ચ [એકતિંસતિ… (સ્યા.)], ચક્કવત્તી અહોસહં;

પદેસરજ્જં વિપુલં, ગણનાતો અસઙ્ખિયં.

૯૮. ‘‘અનુભોમિ સકં પુઞ્ઞં, સુખિતોહં ભવાભવે;

અનુસ્સરામિ તં સઞ્ઞં, સંસરન્તો ભવાભવે;

ન કોટિં પટિવિજ્ઝામિ, નિબ્બાનં અચ્ચુતં પદં.

૯૯. ‘‘પિતુગેહે નિસીદિત્વા, સમણો ભાવિતિન્દ્રિયો;

કથંસ [કથયં (સી. પી. ક.)] પરિદીપેન્તો, અનિચ્ચતમુદાહરિ.

૧૦૦. ‘‘‘અનિચ્ચા વત સઙ્ખારા, ઉપ્પાદવયધમ્મિનો;

ઉપ્પજ્જિત્વા નિરુજ્ઝન્તિ, તેસં વૂપસમો સુખો’.

૧૦૧. ‘‘સહ ગાથં સુણિત્વાન, પુબ્બસઞ્ઞમનુસ્સરિં;

એકાસને નિસીદિત્વા, અરહત્તમપાપુણિં.

૧૦૨. ‘‘જાતિયા સત્તવસ્સેન, અરહત્તમપાપુણિં;

ઉપસમ્પાદયી બુદ્ધો, ધમ્મસ્સવનસ્સિદં ફલં.

૧૦૩. ‘‘સતસહસ્સિતો કપ્પે, યં ધમ્મમસુણિં તદા;

દુગ્ગતિં નાભિજાનામિ, ધમ્મસ્સવનસ્સિદં ફલં.

૧૦૪. ‘‘કિલેસા ઝાપિતા મય્હં…પે… વિહરામિ અનાસવો.

૧૦૫. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૦૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા એકધમ્મસ્સવનિયો થેરો ઇમા

ગાથાયો અભાસિત્થાતિ.

એકધમ્મસ્સવનિયત્થેરસ્સાપદાનં સત્તમં.