૧. સકિંસમ્મજ્જકત્થેરઅપદાનં

૧. ‘‘વિપસ્સિનો ભગવતો, પાટલિં બોધિમુત્તમં;

દિસ્વાવ તં પાદપગ્ગં, તત્થ ચિત્તં પસાદયિં.

૨. ‘‘સમ્મજ્જનિં ગહેત્વાન, બોધિં સમ્મજ્જિ તાવદે;

સમ્મજ્જિત્વાન તં બોધિં, અવન્દિં પાટલિં અહં.

૩. ‘‘તત્થ ચિત્તં પસાદેત્વા, સિરે કત્વાન અઞ્જલિં;

નમસ્સમાનો તં બોધિં, ગઞ્છિં પટિકુટિં અહં.

૪. ‘‘તાદિમગ્ગેન ગચ્છામિ, સરન્તો બોધિમુત્તમં;

અજગરો મં પીળેસિ, ઘોરરૂપો મહબ્બલો.

૫. ‘‘આસન્ને મે કતં કમ્મં, ફલેન તોસયી મમં;

કળેવરં મે ગિલતિ, દેવલોકે રમામહં.

૬. ‘‘અનાવિલં મમ ચિત્તં, વિસુદ્ધં પણ્ડરં સદા;

સોકસલ્લં ન જાનામિ, ચિત્તસન્તાપનં મમ.

૭. ‘‘કુટ્ઠં ગણ્ડો કિલાસો ચ, અપમારો વિતચ્છિકા;

દદ્દુ કણ્ડુ ચ મે નત્થિ, ફલં સમ્મજ્જનાયિદં [સમ્મજ્જને ઇદં (સી.)].

૮. ‘‘સોકો ચ પરિદેવો ચ, હદયે મે ન વિજ્જતિ;

અભન્તં ઉજુકં ચિત્તં, ફલં સમ્મજ્જનાયિદં.

૯. ‘‘સમાધીસુ ન મજ્જામિ [સમાધીસુ ન સજ્જામિ (સી.), સમાધિં પુન પજ્જામિ (સ્યા)], વિસદં હોતિ માનસં;

યં યં સમાધિમિચ્છામિ, સો સો સમ્પજ્જતે મમં.

૧૦. ‘‘રજનીયે ન રજ્જામિ, અથો દુસ્સનિયેસુ [દોસનિયેસુ (સી. સ્યા. ક.)] ચ;

મોહનીયે ન મુય્હામિ, ફલં સમ્મજ્જનાયિદં.

૧૧. ‘‘એકનવુતિતો [એકનવુતે ઇતો (સી. સ્યા.)] કપ્પે, યં કમ્મમકરિં તદા;

દુગ્ગતિં નાભિજાનામિ, ફલં સમ્મજ્જનાયિદં.

૧૨. ‘‘કિલેસા ઝાપિતા મય્હં, ભવા સબ્બે સમૂહતા;

નાગોવ બન્ધનં છેત્વા, વિહરામિ અનાસવો.

૧૩. ‘‘સ્વાગતં વત મે આસિ, મમ બુદ્ધસ્સ સન્તિકે;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૧૪. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા સકિંસમ્મજ્જકો થેરો ઇમા ગાથાયો

અભાસિત્થાતિ.

સકિંસમ્મજ્જકત્થેરસ્સાપદાનં પઠમં.