૯. સોણકોટિવીસત્થેરઅપદાનં

૪૯. ‘‘વિપસ્સિનો પાવચને, એકં લેણં મયા કતં;

ચાતુદ્દિસસ્સ સઙ્ઘસ્સ, બન્ધુમારાજધાનિયા.

૫૦. ‘‘દુસ્સેહિ ભૂમિં લેણસ્સ, સન્થરિત્વા પરિચ્ચજિં;

ઉદગ્ગચિત્તો સુમનો, અકાસિં પણિધિં તદા.

૫૧. ‘‘આરાધયેય્યં સમ્બુદ્ધં, પબ્બજ્જઞ્ચ લભેય્યહં;

અનુત્તરઞ્ચ નિબ્બાનં, ફુસેય્યં સન્તિમુત્તમં.

૫૨. ‘‘તેનેવ સુક્કમૂલેન, કપ્પે [કપ્પં (સી.), કપ્પ (ક.)] નવુતિ સંસરિં;

દેવભૂતો મનુસ્સો ચ, કતપુઞ્ઞો વિરોચહં.

૫૩. ‘‘તતો કમ્માવસેસેન, ઇધ પચ્છિમકે ભવે;

ચમ્પાયં અગ્ગસેટ્ઠિસ્સ, જાતોમ્હિ એકપુત્તકો.

૫૪. ‘‘જાતમત્તસ્સ મે સુત્વા, પિતુ છન્દો અયં અહુ;

દદામહં કુમારસ્સ, વીસકોટી અનૂનકા.

૫૫. ‘‘ચતુરઙ્ગુલા ચ મે લોમા, જાતા પાદતલે ઉભો;

સુખુમા મુદુસમ્ફસ્સા, તૂલાપિચુસમા સુભા.

૫૬. ‘‘અતીતા નવુતિ કપ્પા, અયં એકો ચ ઉત્તરિ;

નાભિજાનામિ નિક્ખિત્તે, પાદે ભૂમ્યા અસન્થતે.

૫૭. ‘‘આરાધિતો મે સમ્બુદ્ધો, પબ્બજિં અનગારિયં;

અરહત્તઞ્ચ મે પત્તં, સીતિભૂતોમ્હિ નિબ્બુતો.

૫૮. ‘‘અગ્ગો આરદ્ધવીરિયાનં, નિદ્દિટ્ઠો સબ્બદસ્સિના;

ખીણાસવોમ્હિ અરહા, છળભિઞ્ઞો મહિદ્ધિકો.

૫૯. ‘‘એકનવુતિતો કપ્પે, યં દાનમદદિં તદા;

દુગ્ગતિં નાભિજાનામિ, લેણદાનસ્સિદં ફલં.

૬૦. ‘‘કિલેસા ઝાપિતા મય્હં…પે… વિહરામિ અનાસવો.

૬૧. ‘‘સ્વાગતં વત મે આસિ…પે… કતં બુદ્ધસ્સ સાસનં.

૬૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

૬૩. ‘‘થેરો કોટિવીસો [કોટિવિસો (સ્યા. ક.), કોળિવિસો (અઞ્ઞટ્ઠાનેસુ)] સોણો, ભિક્ખુસઙ્ઘસ્સ અગ્ગતો;

પઞ્હં પુટ્ઠો વિયાકાસિ, અનોતત્તે મહાસરે’’તિ.

ઇત્થં સુદં આયસ્મા સોણો કોટિવીસો થેરો ઇમા ગાથાયો અભાસિત્થાતિ.

સોણકોટિવીસત્થેરસ્સાપદાનં નવમં.