૪. પટ્ટિપુપ્ફિયત્થેરઅપદાનં

૨૨. ‘‘યદા નિબ્બાયિ સમ્બુદ્ધો, મહેસી પદુમુત્તરો;

સમાગમ્મ જના સબ્બે, સરીરં નીહરન્તિ તે.

૨૩. ‘‘નીહરન્તે સરીરમ્હિ, વજ્જમાનાસુ ભેરિસુ;

પસન્નચિત્તો સુમનો, પટ્ટિપુપ્ફં અપૂજયિં.

૨૪. ‘‘સતસહસ્સિતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, સરીરપૂજિતે ફલં.

૨૫. ‘‘કિલેસા ઝાપિતા મય્હં, ભવા સબ્બે સમૂહતા;

નાગોવ બન્ધનં છેત્વા, વિહરામિ અનાસવો.

૨૬. ‘‘સ્વાગતં વત મે આસિ, મમ બુદ્ધસ્સ [બુદ્ધસેટ્ઠસ્સ (સી.)] સન્તિકે;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૨૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા પટ્ટિપુપ્ફિયો થેરો ઇમા ગાથાયો અભાસિત્થાતિ.

પટ્ટિપુપ્ફિયત્થેરસ્સાપદાનં ચતુત્થં.