૧૦. કાસુમારિફલદાયકત્થેરઅપદાનં

૫૩. ‘‘કણિકારંવ જોતન્તં, નિસિન્નં પબ્બતન્તરે;

અદ્દસં વિરજં બુદ્ધં, લોકજેટ્ઠં નરાસભં.

૫૪. ‘‘પસન્નચિત્તો સુમનો, સિરે કત્વાન અઞ્જલિં;

કાસુમારિફલં ગય્હ, બુદ્ધસેટ્ઠસ્સદાસહં.

૫૫. ‘‘એકત્તિંસે ઇતો કપ્પે, યં ફલમદદિં અહં;

દુગ્ગતિં નાભિજાનામિ, ફલદાનસ્સિદં ફલં.

૫૬. ‘‘કિલેસા ઝાપિતા મય્હં…પે… વિહરામિ અનાસવો.

૫૭. ‘‘સ્વાગતં વત મે આસિ…પે… કતં બુદ્ધસ્સ સાસનં.

૫૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા કાસુમારિફલદાયકો થેરો ઇમા ગાથાયો અભાસિત્થાતિ.

કાસુમારિફલદાયકત્થેરસ્સાપદાનં દસમં.

બોધિવન્દનવગ્ગો અટ્ઠતિંસતિમો.