૧. બોધિવન્દકત્થેરઅપદાનં

૧. ‘‘પાટલિં હરિતં દિસ્વા, પાદપં ધરણીરુહં;

એકંસં અઞ્જલિં કત્વા, અવન્દિં પાટલિં અહં.

૨. ‘‘અઞ્જલિં પગ્ગહેત્વાન, ગરું કત્વાન માનસં;

અન્તોસુદ્ધં બહિસુદ્ધં, સુવિમુત્તમનાસવં.

૩. ‘‘વિપસ્સિં લોકમહિતં, કરુણાઞાણસાગરં;

સમ્મુખા વિય સમ્બુદ્ધં, અવન્દિં પાટલિં અહં.

૪. ‘‘એકનવુતિતો કપ્પે, યં બોધિમભિવન્દહં;

દુગ્ગતિં નાભિજાનામિ, વન્દનાય ઇદં ફલં.

૫. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા બોધિવન્દકો થેરો ઇમા ગાથાયો અભાસિત્થાતિ.

બોધિવન્દકત્થેરસ્સાપદાનં પઠમં.