૮. તિણમુટ્ઠિદાયકત્થેરઅપદાનં

૪૮. ‘‘હિમવન્તસ્સાવિદૂરે, લમ્બકો નામ પબ્બતો;

ઉપતિસ્સો નામ સમ્બુદ્ધો, અબ્ભોકાસમ્હિ ચઙ્કમિ.

૪૯. ‘‘મિગલુદ્દો તદા આસિં, અરઞ્ઞે કાનને અહં;

દિસ્વાન તં દેવદેવં, સયમ્ભું અપરાજિતં.

૫૦. ‘‘વિપ્પસન્નેન ચિત્તેન, તદા તસ્સ મહેસિનો;

નિસીદનત્થં બુદ્ધસ્સ, તિણમુટ્ઠિમદાસહં.

૫૧. ‘‘દત્વાન દેવદેવસ્સ, ભિય્યો ચિત્તં પસાદયિં;

સમ્બુદ્ધં અભિવાદેત્વા, પક્કામિં ઉત્તરામુખો.

૫૨. ‘‘અચિરં ગતમત્તં મં, મિગરાજા અપોથયિ [અહેઠયિ (સી. સ્યા.)];

સીહેન પોથિતો [પાતિતો (સી. સ્યા.)] સન્તો, તત્થ કાલઙ્કતો અહં.

૫૩. ‘‘આસન્ને મે કતં કમ્મં, બુદ્ધસેટ્ઠે અનાસવે;

સુમુત્તો સરવેગોવ, દેવલોકં અગઞ્છહં.

૫૪. ‘‘યૂપો તત્થ સુભો આસિ, પુઞ્ઞકમ્માભિનિમ્મિતો;

સહસ્સકણ્ડો સતભેણ્ડુ, ધજાલુ હરિતામયો.

૫૫. ‘‘પભા નિદ્ધાવતે તસ્સ, સતરંસીવ ઉગ્ગતો;

આકિણ્ણો દેવકઞ્ઞાહિ, આમોદિં કામકામહં.

૫૬. ‘‘દેવલોકા ચવિત્વાન, સુક્કમૂલેન ચોદિતો;

આગન્ત્વાન મનુસ્સત્તં, પત્તોમ્હિ આસવક્ખયં.

૫૭. ‘‘ચતુન્નવુતિતો કપ્પે, નિસીદનમદાસહં;

દુગ્ગતિં નાભિજાનામિ, તિણમુટ્ઠિયિદં ફલં.

૫૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા તિણમુટ્ઠિદાયકો થેરો ઇમા ગાથાયો અભાસિત્થાતિ.

તિણમુટ્ઠિદાયકત્થેરસ્સાપદાનં અટ્ઠમં.