૧. એકપદુમિયત્થેરઅપદાનં

૧. ‘‘પદુમુત્તરો નામ જિનો, સબ્બધમ્માન પારગૂ;

ભવાભવે વિભાવેન્તો, તારેસિ જનતં બહું.

૨. ‘‘હંસરાજા તદા હોમિ, દિજાનં પવરો અહં;

જાતસ્સરં સમોગય્હ, કીળામિ હંસકીળિતં.

૩. ‘‘પદુમુત્તરો લોકવિદૂ, આહુતીનં પટિગ્ગહો;

જાતસ્સરસ્સ ઉપરિ, આગચ્છિ તાવદે જિનો.

૪. ‘‘દિસ્વાનહં દેવદેવં, સયમ્ભું લોકનાયકં;

વણ્ટે છેત્વાન પદુમં, સતપત્તં મનોરમં.

૫. ‘‘મુખતુણ્ડેન પગ્ગય્હ, પસન્નો લોકનાયકે [વિપ્પસન્નેન ચેતસા (સ્યા.)];

ઉક્ખિપિત્વાન ગગણે [ઉક્ખિપિત્વા નલાટેન (ક.)], બુદ્ધસેટ્ઠં અપૂજયિં.

૬. ‘‘પદુમુત્તરો લોકવિદૂ, આહુતીનં પટિગ્ગહો;

અન્તલિક્ખે ઠિતો સત્થા, અકા મે અનુમોદનં.

૭. ‘‘‘ઇમિના એકપદુમેન, ચેતનાપણિધીહિ ચ;

કપ્પાનં સતસહસ્સં, વિનિપાતં ન ગચ્છસિ’.

૮. ‘‘ઇદં વત્વાન સમ્બુદ્ધો, જલજુત્તમનામકો;

મમ કમ્મં પકિત્તેત્વા, અગમા યેન પત્થિતં.

૯. ‘‘સતસહસ્સિતો કપ્પે, યં કમ્મમકરિં તદા;

દુગ્ગતિં નાભિજાનામિ, બુદ્ધપૂજાયિદં ફલં.

૧૦. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા એકપદુમિયો થેરો ઇમા ગાથાયો અભાસિત્થાતિ.

એકપદુમિયત્થેરસ્સાપદાનં પઠમં.