૪. અબ્ભઞ્જનદાયકત્થેરઅપદાનં

૧૪. ‘‘કોણ્ડઞ્ઞસ્સ ભગવતો, વીતરાગસ્સ તાદિનો;

આકાસસમચિત્તસ્સ [અકક્કસચિત્તસ્સાથ (અટ્ઠ.)], નિપ્પપઞ્ચસ્સ ઝાયિનો.

૧૫. ‘‘સબ્બમોહાતિવત્તસ્સ, સબ્બલોકહિતેસિનો;

અબ્ભઞ્જનં મયા દિન્નં, દ્વિપદિન્દસ્સ તાદિનો.

૧૬. ‘‘અપરિમેય્યે ઇતો કપ્પે, અબ્ભઞ્જનમદં તદા [અમ્ભઞ્જનમદાસહં (સ્યા.)];

દુગ્ગતિં નાભિજાનામિ, અબ્ભઞ્જનસ્સિદં ફલં.

૧૭. ‘‘ઇતો પન્નરસે કપ્પે, ચિરપ્પો નામ ખત્તિયો;

સત્તરતનસમ્પન્નો, ચક્કવત્તી મહબ્બલો.

૧૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અબ્ભઞ્જનદાયકો થેરો ઇમા ગાથાયો અભાસિત્થાતિ.

અબ્ભઞ્જનદાયકત્થેરસ્સાપદાનં ચતુત્થં.