૩. નળિનકેસરિયત્થેરઅપદાનં

૯. ‘‘જાતસ્સરસ્સ વેમજ્ઝે, વસામિ જલકુક્કુટો;

અદ્દસાહં [અથદ્દસં (સી. સ્યા.)] દેવદેવં, ગચ્છન્તં અનિલઞ્જસે.

૧૦. ‘‘તુણ્ડેન કેસરિં [કેસરં (સ્યા.)] ગય્હ, વિપ્પસન્નેન ચેતસા;

બુદ્ધસ્સ અભિરોપેસિં, તિસ્સસ્સ લોકબન્ધુનો.

૧૧. ‘‘દ્વેનવુતે ઇતો કપ્પે, યં પુપ્ફમભિપૂજયિં;

દુગ્ગતિં નાભિજાનામિ, બુદ્ધપૂજાયિદં ફલં.

૧૨. ‘‘તેસત્તતિમ્હિ કપ્પમ્હિ, સત્ત કેસરનામકા [સતપત્તસનામકો (સી. સ્યા.)];

સત્તરતનસમ્પન્ના, ચક્કવત્તી મહબ્બલા.

૧૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા નળિનકેસરિયો થેરો ઇમા ગાથાયો અભાસિત્થાતિ.

નળિનકેસરિયત્થેરસ્સાપદાનં તતિયં.