૮. રટ્ઠપાલત્થેરઅપદાનં

૯૭. ‘‘પદુમુત્તરસ્સ ભગવતો, લોકજેટ્ઠસ્સ તાદિનો;

વરનાગો મયા દિન્નો, ઈસાદન્તો ઉરૂળ્હવા.

૯૮. ‘‘સેતચ્છત્તો પસોભિતો, સકપ્પનો સહત્થિપો;

અગ્ઘાપેત્વાન તં સબ્બં, સઙ્ઘારામં અકારયિં.

૯૯. ‘‘ચતુપઞ્ઞાસસહસ્સાનિ, પાસાદે કારયિં અહં;

મહોઘદાનં [મહાભત્તં (સી.), મહોઘઞ્ચ (ક.), મહાદાનં (?)] કરિત્વાન, નિય્યાદેસિં મહેસિનો.

૧૦૦. ‘‘અનુમોદિ મહાવીરો, સયમ્ભૂ અગ્ગપુગ્ગલો;

સબ્બે જને હાસયન્તો, દેસેસિ અમતં પદં.

૧૦૧. ‘‘તં મે બુદ્ધો વિયાકાસિ, જલજુત્તરનામકો;

ભિક્ખુસઙ્ઘે નિસીદિત્વા, ઇમા ગાથા અભાસથ.

૧૦૨. ‘‘‘ચતુપઞ્ઞાસસહસ્સાનિ, પાસાદે કારયી અયં;

કથયિસ્સામિ વિપાકં, સુણોથ મમ ભાસતો.

૧૦૩. ‘‘‘અટ્ઠારસસહસ્સાનિ, કૂટાગારા ભવિસ્સરે;

બ્યમ્હુત્તમમ્હિ નિબ્બત્તા, સબ્બસોણ્ણમયા ચ તે.

૧૦૪. ‘‘‘પઞ્ઞાસક્ખત્તું દેવિન્દો, દેવરજ્જં કરિસ્સતિ;

અટ્ઠપઞ્ઞાસક્ખત્તુઞ્ચ, ચક્કવત્તી ભવિસ્સતિ.

૧૦૫. ‘‘‘કપ્પસતસહસ્સમ્હિ, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૧૦૬. ‘‘‘દેવલોકા ચવિત્વાન, સુક્કમૂલેન ચોદિતો;

અડ્ઢે કુલે મહાભોગે, નિબ્બત્તિસ્સતિ તાવદે.

૧૦૭. ‘‘‘સો પચ્છા પબ્બજિત્વાન, સુક્કમૂલેન ચોદિતો;

રટ્ઠપાલોતિ નામેન, હેસ્સતિ સત્થુ સાવકો.

૧૦૮. ‘‘‘પધાનપહિતત્તો સો, ઉપસન્તો નિરૂપધિ;

સબ્બાસવે પરિઞ્ઞાય, નિબ્બાયિસ્સતિનાસવો’.

૧૦૯. ‘‘ઉટ્ઠાય અભિનિક્ખમ્મ, જહિતા ભોગસમ્પદા;

ખેળપિણ્ડેવ ભોગમ્હિ, પેમં મય્હં ન વિજ્જતિ.

૧૧૦. ‘‘વીરિયં મે ધુરધોરય્હં, યોગક્ખેમાધિવાહનં;

ધારેમિ અન્તિમં દેહં, સમ્માસમ્બુદ્ધસાસને.

૧૧૧. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા રટ્ઠપાલો થેરો ઇમા ગાથાયો અભાસિત્થાતિ.

રટ્ઠપાલત્થેરસ્સાપદાનં અટ્ઠમં.