૩. નન્દત્થેરઅપદાનં

૨૭. ‘‘પદુમુત્તરસ્સ ભગવતો, લોકજેટ્ઠસ્સ તાદિનો;

વત્થં ખોમં મયા દિન્નં, સયમ્ભુસ્સ મહેસિનો.

૨૮. ‘‘તં મે બુદ્ધો વિયાકાસિ, જલજુત્તરનામકો;

‘ઇમિના વત્થદાનેન, હેમવણ્ણો ભવિસ્સસિ.

૨૯. ‘‘‘દ્વે સમ્પત્તી અનુભોત્વા, કુસલમૂલેહિ ચોદિતો;

ગોતમસ્સ ભગવતો, કનિટ્ઠો ત્વં ભવિસ્સસિ.

૩૦. ‘‘‘રાગરત્તો સુખસીલો, કામેસુ ગેધમાયુતો;

બુદ્ધેન ચોદિતો સન્તો, તદા [તતો (સ્યા.)] ત્વં પબ્બજિસ્સસિ.

૩૧. ‘‘‘પબ્બજિત્વાન ત્વં તત્થ, કુસલમૂલેન ચોદિતો;

સબ્બાસવે પરિઞ્ઞાય, નિબ્બાયિસ્સસિનાસવો’.

૩૨. ‘‘સત્ત [સત (સ્યા.)] કપ્પસહસ્સમ્હિ, ચતુરો ચેળનામકા;

સટ્ઠિ કપ્પસહસ્સમ્હિ, ઉપચેલા ચતુજ્જના.

૩૩. ‘‘પઞ્ચ કપ્પસહસ્સમ્હિ, ચેળાવ ચતુરો જના;

સત્તરતનસમ્પન્ના, ચતુદીપમ્હિ ઇસ્સરા.

૩૪. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા નન્દો થેરો ઇમા ગાથાયો અભાસિત્થાતિ.

નન્દત્થેરસ્સાપદાનં તતિયં.