૪. આરક્ખદાયકત્થેરઅપદાનં

૧૯. ‘‘સિદ્ધત્થસ્સ ભગવતો, વેદિ કારાપિતા [વેદિકા કારિતા (સ્યા.)] મયા;

આરક્ખો ચ મયા દિન્નો, સુગતસ્સ મહેસિનો.

૨૦. ‘‘તેન કમ્મવિસેસેન, ન પસ્સિં ભયભેરવં;

કુહિઞ્ચિ ઉપપન્નસ્સ, તાસો મય્હં ન વિજ્જતિ.

૨૧. ‘‘ચતુન્નવુતિતો કપ્પે, યં વેદિં કારયિં પુરે;

દુગ્ગતિં નાભિજાનામિ, વેદિકાય ઇદં ફલં.

૨૨. ‘‘ઇતો છટ્ઠમ્હિ કપ્પમ્હિ, અપસ્સેનસનામકો;

સત્તરતનસમ્પન્નો, ચક્કવત્તી મહબ્બલો.

૨૩. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા આરક્ખદાયકો થેરો ઇમા ગાથાયો અભાસિત્થાતિ.

આરક્ખદાયકત્થેરસ્સાપદાનં ચતુત્થં.