૨. અજિનદાયકત્થેરઅપદાનં

૬. ‘‘એકત્તિંસે ઇતો કપ્પે, ગણસત્થારકો અહં;

અદ્દસં વિરજં બુદ્ધં, આહુતીનં પટિગ્ગહં.

૭. ‘‘ચમ્મખણ્ડં મયા દિન્નં, સિખિનો લોકબન્ધુનો;

તેન કમ્મેન દ્વિપદિન્દ, લોકજેટ્ઠ નરાસભ.

૮. ‘‘સમ્પત્તિં અનુભોત્વાન, કિલેસે ઝાપયિં અહં;

ધારેમિ અન્તિમં દેહં, સમ્માસમ્બુદ્ધસાસને.

૯. ‘‘એકત્તિંસે ઇતો કપ્પે, અજિનં યં અદાસહં;

દુગ્ગતિં નાભિજાનામિ, અજિનસ્સ ઇદં ફલં.

૧૦. ‘‘ઇતો પઞ્ચમકે કપ્પે, રાજા આસિં સુદાયકો;

સત્તરતનસમ્પન્નો, ચક્કવત્તી મહબ્બલો.

૧૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા અજિનદાયકો થેરો ઇમા ગાથાયો અભાસિત્થાતિ.

અજિનદાયકત્થેરસ્સાપદાનં દુતિયં.