૫. રહોસઞ્ઞકત્થેરઅપદાનં

૩૪. ‘‘હિમવન્તસ્સાવિદૂરે, વસભો નામ પબ્બતો;

તસ્મિં પબ્બતપાદમ્હિ, અસ્સમો આસિ માપિતો.

૩૫. ‘‘તીણિ સિસ્સસહસ્સાનિ, વાચેસિં બ્રાહ્મણો [બ્રાહ્મણે (સી.)] તદા;

સંહરિત્વાન [સંસાવિત્વાન (સ્યા.)] તે સિસ્સે, એકમન્તં ઉપાવિસિં.

૩૬. ‘‘એકમન્તં નિસીદિત્વા, બ્રાહ્મણો મન્તપારગૂ;

બુદ્ધવેદં ગવેસન્તો [પવેસન્તો (ક.)], ઞાણે ચિત્તં પસાદયિં.

૩૭. ‘‘તત્થ ચિત્તં પસાદેત્વા, નિસીદિં પણ્ણસન્થરે;

પલ્લઙ્કં આભુજિત્વાન, તત્થ કાલઙ્કતો અહં.

૩૮. ‘‘એકત્તિંસે ઇતો કપ્પે, યં સઞ્ઞમલભિં તદા;

દુગ્ગતિં નાભિજાનામિ, ઞાણસઞ્ઞાયિદં ફલં.

૩૯. ‘‘સત્તવીસતિકપ્પમ્હિ, રાજા સિરિધરો અહુ;

સત્તરતનસમ્પન્નો, ચક્કવત્તી મહબ્બલો.

૪૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા રહોસઞ્ઞકો થેરો ઇમા ગાથાયો અભાસિત્થાતિ.

રહોસઞ્ઞકત્થેરસ્સાપદાનં પઞ્ચમં.