૯. ગણ્ઠિપુપ્ફિયત્થેરઅપદાનં

૯૧. ‘‘સુવણ્ણવણ્ણો સમ્બુદ્ધો, વિપસ્સી દક્ખિણારહો;

પુરક્ખતો સાવકેહિ, આરામા અભિનિક્ખમિ.

૯૨. ‘‘દિસ્વાનહં બુદ્ધસેટ્ઠં, સબ્બઞ્ઞું તમનાસકં;

પસન્નચિત્તો સુમનો, ગણ્ઠિપુપ્ફં [ગતમગ્ગં (સ્યા. ક.)] અપૂજયિં.

૯૩. ‘‘તેન ચિત્તપ્પસાદેન, દ્વિપદિન્દસ્સ તાદિનો;

હટ્ઠો હટ્ઠેન ચિત્તેન, પુન વન્દિં તથાગતં.

૯૪. ‘‘એકનવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, બુદ્ધપૂજાયિદં ફલં.

૯૫. ‘‘એકતાલીસિતો કપ્પે, ચરણો નામ ખત્તિયો;

સત્તરતનસમ્પન્નો, ચક્કવત્તી મહબ્બલો.

૯૬. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ગણ્ઠિપુપ્ફિયો [ગન્ધપુપ્ફિયો (સ્યા. ક.)] થેરો ઇમા ગાથાયો અભાસિત્થાતિ.

ગણ્ઠિપુપ્ફિયત્થેરસ્સાપદાનં નવમં.