૧. સેરેય્યકત્થેરઅપદાનં

૧. ‘‘અજ્ઝાયકો મન્તધરો, તિણ્ણં વેદાન પારગૂ;

અબ્ભોકાસે ઠિતો સન્તો, અદ્દસં લોકનાયકં.

૨. ‘‘સીહં યથા વનચરં, બ્યગ્ઘરાજંવ નિત્તસં;

તિધાપભિન્નમાતઙ્ગં, કુઞ્જરંવ મહેસિનં.

૩. ‘‘સેરેય્યકં ગહેત્વાન, આકાસે ઉક્ખિપિં [નિક્ખિપિં (ક.)] અહં;

બુદ્ધસ્સ આનુભાવેન, પરિવારેન્તિ સબ્બસો [સબ્બતો (સી.)].

૪. ‘‘અધિટ્ઠહિ મહાવીરો, સબ્બઞ્ઞૂ લોકનાયકો;

સમન્તા પુપ્ફચ્છદના, ઓકિરિંસુ નરાસભં.

૫. ‘‘તતો સા પુપ્ફકઞ્ચુકા, અન્તોવણ્ટા બહિમુખા;

સત્તાહં છદનં કત્વા, તતો અન્તરધાયથ.

૬. ‘‘તઞ્ચ અચ્છરિયં દિસ્વા, અબ્ભુતં લોમહંસનં;

બુદ્ધે ચિત્તં પસાદેસિં, સુગતે લોકનાયકે.

૭. ‘‘તેન ચિત્તપ્પસાદેન, સુક્કમૂલેન ચોદિતો;

કપ્પાનં સતસહસ્સં, દુગ્ગતિં નુપપજ્જહં.

૮. ‘‘પન્નરસસહસ્સમ્હિ, કપ્પાનં પઞ્ચવીસતિ;

વીતમલા [ચિત્તમાલા (સી.), વિલામાલા (સ્યા.)] સમાના ચ, ચક્કવત્તી મહબ્બલા.

૯. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા સેરેય્યકો થેરો ઇમા ગાથાયો અભાસિત્થાતિ.

સેરેય્યકત્થેરસ્સાપદાનં પઠમં.