૮. આસનુપટ્ઠાહકત્થેરઅપદાનં

૪૭. ‘‘કાનનં વનમોગય્હ, અપ્પસદ્દં નિરાકુલં;

સીહાસનં મયા દિન્નં, અત્થદસ્સિસ્સ તાદિનો.

૪૮. ‘‘માલાહત્થં ગહેત્વાન, કત્વા ચ નં પદક્ખિણં;

સત્થારં પયિરુપાસિત્વા, પક્કામિં ઉત્તરામુખો.

૪૯. ‘‘તેન કમ્મેન દ્વિપદિન્દ, લોકજેટ્ઠ નરાસભ;

સન્નિબ્બાપેમિ [સન્દિટ્ઠાપેમિ (ક.)] અત્તાનં, ભવા સબ્બે સમૂહતા.

૫૦. ‘‘અટ્ઠારસકપ્પસતે, યં દાનમદદિં તદા;

દુગ્ગતિં નાભિજાનામિ, સીહાસનસ્સિદં ફલં.

૫૧. ‘‘ઇતો સત્તકપ્પસતે, સન્નિબ્બાપક [સન્નિટ્ઠો નામ (ક.)] ખત્તિયો;

સત્તરતનસમ્પન્નો, ચક્કવત્તી મહબ્બલો.

૫૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા આસનુપટ્ઠાહકો થેરો ઇમા ગાથાયો અભાસિત્થાતિ.

આસનુપટ્ઠાહકત્થેરસ્સાપદાનં અટ્ઠમં.