૩. ઉપ્પલહત્થિયત્થેરઅપદાનં

૧૩. ‘‘તિવરાયં નિવાસીહં, અહોસિં માલિકો તદા;

અદ્દસં વિરજં બુદ્ધં, સિદ્ધત્થં લોકપૂજિતં [લોકનાયકં (સી.)].

૧૪. ‘‘પસન્નચિત્તો સુમનો, પુપ્ફહત્થમદાસહં;

યત્થ યત્થુપપજ્જામિ, તસ્સ કમ્મસ્સ વાહસા.

૧૫. ‘‘અનુભોમિ ફલં ઇટ્ઠં, પુબ્બે સુકતમત્તનો;

પરિક્ખિત્તો સુમલ્લેહિ, પુપ્ફદાનસ્સિદં ફલં.

૧૬. ‘‘ચતુન્નવુતિતો કપ્પે, યં પુપ્ફમભિરોપયિં;

દુગ્ગતિં નાભિજાનામિ, પુપ્ફપૂજાયિદં [બુદ્ધપૂજાયિદં (સી.)] ફલં.

૧૭. ‘‘ચતુન્નવુતુપાદાય, ઠપેત્વા વત્તમાનકં;

પઞ્ચરાજસતા તત્થ, નજ્જસમસનામકા [નજ્જુપમસનામકા (સી. સ્યા.)].

૧૮. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં આયસ્મા ઉપ્પલહત્થિયો થેરો ઇમા ગાથાયો અભાસિત્થાતિ.

ઉપ્પલહત્થિયત્થેરસ્સાપદાનં તતિયં.