૩-૧૦. આનન્દત્થેરઅપદાનં

૬૪૪. ‘‘આરામદ્વારા નિક્ખમ્મ, પદુમુત્તરો મહામુનિ;

વસ્સેન્તો અમતં વુટ્ઠિં, નિબ્બાપેસિ મહાજનં.

૬૪૫. ‘‘સતસહસ્સં તે ધીરા, છળભિઞ્ઞા મહિદ્ધિકા;

પરિવારેન્તિ સમ્બુદ્ધં, છાયાવ અનપાયિની [અનુપાયિની (સ્યા. ક.)].

૬૪૬. ‘‘હત્થિક્ખન્ધગતો આસિં, સેતચ્છત્તં વરુત્તમં;

સુચારુરૂપં દિસ્વાન, વિત્તિ મે ઉદપજ્જથ.

૬૪૭. ‘‘ઓરુય્હ હત્થિખન્ધમ્હા, ઉપગચ્છિં નરાસભં;

રતનામયછત્તં મે, બુદ્ધસેટ્ઠસ્સ ધારયિં.

૬૪૮. ‘‘મમ સઙ્કપ્પમઞ્ઞાય, પદુમુત્તરો મહાઇસિ;

તં કથં ઠપયિત્વાન, ઇમા ગાથા અભાસથ.

૬૪૯. ‘‘‘યો સો છત્તમધારેસિ, સોણ્ણાલઙ્કારભૂસિતં;

તમહં કિત્તયિસ્સામિ, સુણોથ મમ ભાસતો.

૬૫૦. ‘‘‘ઇતો ગન્ત્વા અયં પોસો, તુસિતં આવસિસ્સતિ;

અનુભોસ્સતિ સમ્પત્તિં, અચ્છરાહિ પુરક્ખતો.

૬૫૧. ‘‘‘ચતુત્તિંસતિક્ખત્તુઞ્ચ, દેવરજ્જં કરિસ્સતિ;

બલાધિપો અટ્ઠસતં, વસુધં આવસિસ્સતિ.

૬૫૨. ‘‘‘અટ્ઠપઞ્ઞાસક્ખત્તુઞ્ચ, ચક્કવત્તી ભવિસ્સતિ;

પદેસરજ્જં વિપુલં, મહિયા કારયિસ્સતિ.

૬૫૩. ‘‘‘કપ્પસતસહસ્સમ્હિ, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૬૫૪. ‘‘‘સક્યાનં કુલકેતુસ્સ, ઞાતિબન્ધુ ભવિસ્સતિ;

આનન્દો નામ નામેન, ઉપટ્ઠાકો મહેસિનો.

૬૫૫. ‘‘‘આતાપી નિપકો ચાપિ, બાહુસચ્ચે સુકોવિદો;

નિવાતવુત્તિ અત્થદ્ધો, સબ્બપાઠી ભવિસ્સતિ.

૬૫૬. ‘‘‘પધાનપહિતત્તો સો, ઉપસન્તો નિરૂપધિ;

સબ્બાસવે પરિઞ્ઞાય, નિબ્બાયિસ્સતિનાસવો.

૬૫૭. ‘‘‘સન્તિ આરઞ્ઞકા નાગા, કુઞ્જરા સટ્ઠિહાયના;

તિધાપભિન્ના માતઙ્ગા, ઈસાદન્તા ઉરૂળ્હવા.

૬૫૮. ‘‘‘અનેકસતસહસ્સા, પણ્ડિતાપિ મહિદ્ધિકા;

સબ્બે તે બુદ્ધનાગસ્સ, ન હોન્તુ પણિધિમ્હિ તે’ [ન હોન્તિ પરિવિમ્ભિતા (સ્યા.), ન હોન્તિ પણિધિમ્હિ તે (ક.)].

૬૫૯. ‘‘આદિયામે નમસ્સામિ, મજ્ઝિમે અથ પચ્છિમે;

પસન્નચિત્તો સુમનો, બુદ્ધસેટ્ઠં ઉપટ્ઠહિં.

૬૬૦. ‘‘આતાપી નિપકો ચાપિ, સમ્પજાનો પતિસ્સતો;

સોતાપત્તિફલં પત્તો, સેખભૂમીસુ કોવિદો.

૬૬૧. ‘‘સતસહસ્સિતો કપ્પે, યં કમ્મમભિનીહરિં;

તાહં ભૂમિમનુપ્પત્તો, ઠિતા સદ્ધમ્મમાચલા [ઠિતો સદ્ધમ્મમાચલો (સી.), ઠિતા સદ્ધા મહપ્ફલા (સ્યા.)].

૬૬૨. ‘‘સ્વાગતં વત મે આસિ, બુદ્ધસેટ્ઠસ્સ સન્તિકે;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૬૬૩. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં આયસ્મા આનન્દો થેરો ઇમા ગાથાયો અભાસિત્થાતિ.

આનન્દત્થેરસ્સાપદાનં દસમં.

તસ્સુદ્દાનં –

બુદ્ધો પચ્ચેકબુદ્ધો ચ, સારિપુત્તો ચ કોલિતો;

કસ્સપો અનુરુદ્ધો ચ, પુણ્ણત્થેરો ઉપાલિ ચ.

અઞ્ઞાસિકોણ્ડઞ્ઞો પિણ્ડોલો, રેવતાનન્દપણ્ડિતો;

છસતાનિ ચ પઞ્ઞાસ, ગાથાયો સબ્બપિણ્ડિતા.

અપદાને બુદ્ધવગ્ગો પઠમો.