(૩૦) સીહહનુલક્ખણં

૨૩૮. ‘‘યમ્પિ, ભિક્ખવે, તથાગતો પુરિમં જાતિં પુરિમં ભવં પુરિમં નિકેતં પુબ્બે મનુસ્સભૂતો સમાનો સમ્ફપ્પલાપં પહાય સમ્ફપ્પલાપા પટિવિરતો અહોસિ કાલવાદી ભૂતવાદી અત્થવાદી ધમ્મવાદી વિનયવાદી, નિધાનવતિં વાચં ભાસિતા અહોસિ કાલેન સાપદેસં પરિયન્તવતિં અત્થસંહિતં. સો તસ્સ કમ્મસ્સ કટત્તા…પે… સો તતો ચુતો ઇત્થત્તં આગતો સમાનો ઇમં મહાપુરિસલક્ખણં પટિલભતિ, સીહહનુ હોતિ.

‘‘સો તેન લક્ખણેન સમન્નાગતો સચે અગારં અજ્ઝાવસતિ, રાજા હોતિ ચક્કવત્તી…પે… રાજા સમાનો કિં લભતિ? અપ્પધંસિયો હોતિ કેનચિ મનુસ્સભૂતેન પચ્ચત્થિકેન પચ્ચામિત્તેન. રાજા સમાનો ઇદં લભતિ… બુદ્ધો સમાનો કિં લભતિ? અપ્પધંસિયો હોતિ અબ્ભન્તરેહિ વા બાહિરેહિ વા પચ્ચત્થિકેહિ પચ્ચામિત્તેહિ, રાગેન વા દોસેન વા મોહેન વા સમણેન વા બ્રાહ્મણેન વા દેવેન વા મારેન વા બ્રહ્મુના વા કેનચિ વા લોકસ્મિં. બુદ્ધો સમાનો ઇદં લભતિ’’. એતમત્થં ભગવા અવોચ.

૨૩૯. તત્થેતં વુચ્ચતિ –

‘‘ન સમ્ફપ્પલાપં ન મુદ્ધતં [બુદ્ધતન્તિ (ક.)],

અવિકિણ્ણવચનબ્યપ્પથો અહોસિ;

અહિતમપિ ચ અપનુદિ,

હિતમપિ ચ બહુજનસુખઞ્ચ અભણિ.

‘‘તં કત્વા ઇતો ચુતો દિવમુપપજ્જિ,

સુકતફલવિપાકમનુભોસિ;

ચવિય પુનરિધાગતો સમાનો,

દ્વિદુગમવરતરહનુત્તમલત્થ.

‘‘રાજા હોતિ સુદુપ્પધંસિયો,

મનુજિન્દો મનુજાધિપતિ મહાનુભાવો;

તિદિવપુરવરસમો ભવતિ,

સુરવરતરોરિવ ઇન્દો.

‘‘ગન્ધબ્બાસુરયક્ખરક્ખસેભિ [સુરસક્કરક્ખસેભિ (સ્યા.)],

સુરેહિ ન હિ ભવતિ સુપ્પધંસિયો;

તથત્તો યદિ ભવતિ તથાવિધો,

ઇધ દિસા ચ પટિદિસા ચ વિદિસા ચા’’તિ.