(૨૧-૨૨) અભિનીલનેત્તગોપખુમલક્ખણાનિ

૨૨૮. ‘‘યમ્પિ, ભિક્ખવે, તથાગતો પુરિમં જાતિં પુરિમં ભવં પુરિમં નિકેતં પુબ્બે મનુસ્સભૂતો સમાનો ન ચ વિસટં, ન ચ વિસાચિ [ન ચ વિસાચિતં (સી. પી.), ન ચ વિસાવિ (સ્યા.)], ન ચ પન વિચેય્ય પેક્ખિતા, ઉજું તથા પસટમુજુમનો, પિયચક્ખુના બહુજનં ઉદિક્ખિતા અહોસિ. સો તસ્સ કમ્મસ્સ કટત્તા…પે… સો તતો ચુતો ઇત્થત્તં આગતો સમાનો ઇમાનિ દ્વે મહાપુરિસલક્ખણાનિ પટિલભતિ. અભિનીલનેત્તો ચ હોતિ ગોપખુમો ચ.

‘‘સો તેહિ લક્ખણેહિ સમન્નાગતો, સચે અગારં અજ્ઝાવસતિ, રાજા હોતિ ચક્કવત્તી…પે… રાજા સમાનો કિં લભતિ? પિયદસ્સનો હોતિ બહુનો જનસ્સ, પિયો હોતિ મનાપો બ્રાહ્મણગહપતિકાનં નેગમજાનપદાનં ગણકમહામત્તાનં અનીકટ્ઠાનં દોવારિકાનં અમચ્ચાનં પારિસજ્જાનં રાજૂનં ભોગિયાનં કુમારાનં. રાજા સમાનો ઇદં લભતિ…પે… બુદ્ધો સમાનો કિં લભતિ? પિયદસ્સનો હોતિ બહુનો જનસ્સ, પિયો હોતિ મનાપો ભિક્ખૂનં ભિક્ખુનીનં ઉપાસકાનં ઉપાસિકાનં દેવાનં મનુસ્સાનં અસુરાનં નાગાનં ગન્ધબ્બાનં. બુદ્ધો સમાનો ઇદં લભતિ’’. એતમત્થં ભગવા અવોચ.

૨૨૯. તત્થેતં વુચ્ચતિ –

‘‘ન ચ વિસટં ન ચ વિસાચિ [વિસાચિતં (સી. પી.), વિસાવિ (સ્યા.)], ન ચ પન વિચેય્યપેક્ખિતા;

ઉજું તથા પસટમુજુમનો, પિયચક્ખુના બહુજનં ઉદિક્ખિતા.

‘‘સુગતીસુ સો ફલવિપાકં,

અનુભવતિ તત્થ મોદતિ;

ઇધ ચ પન ભવતિ ગોપખુમો,

અભિનીલનેત્તનયનો સુદસ્સનો.

‘‘અભિયોગિનો ચ નિપુણા,

બહૂ પન નિમિત્તકોવિદા;

સુખુમનયનકુસલા મનુજા,

પિયદસ્સનોતિ અભિનિદ્દિસન્તિ નં.

‘‘પિયદસ્સનો ગિહીપિ સન્તો ચ,

ભવતિ બહુજનપિયાયિતો;

યદિ ચ ન ભવતિ ગિહી સમણો હોતિ,

પિયો બહૂનં સોકનાસનો’’તિ.