(૧૪) કોસોહિતવત્થગુય્હલક્ખણં

૨૨૦. યમ્પિ, ભિક્ખવે, તથાગતો પુરિમં જાતિં પુરિમં ભવં પુરિમં નિકેતં પુબ્બે મનુસ્સભૂતો સમાનો ચિરપ્પનટ્ઠે સુચિરપ્પવાસિનો ઞાતિમિત્તે સુહજ્જે સખિનો સમાનેતા અહોસિ. માતરમ્પિ પુત્તેન સમાનેતા અહોસિ, પુત્તમ્પિ માતરા સમાનેતા અહોસિ, પિતરમ્પિ પુત્તેન સમાનેતા અહોસિ, પુત્તમ્પિ પિતરા સમાનેતા અહોસિ, ભાતરમ્પિ ભાતરા સમાનેતા અહોસિ, ભાતરમ્પિ ભગિનિયા સમાનેતા અહોસિ, ભગિનિમ્પિ ભાતરા સમાનેતા અહોસિ, ભગિનિમ્પિ ભગિનિયા સમાનેતા અહોસિ, સમઙ્ગીકત્વા [સમગ્ગિં કત્વા (સી. સ્યા. પી.)] ચ અબ્ભનુમોદિતા અહોસિ. સો તસ્સ કમ્મસ્સ કટત્તા…પે… સો તતો ચુતો ઇત્થત્તં આગતો સમાનો ઇમં મહાપુરિસલક્ખણં પટિલભતિ – કોસોહિતવત્થગુય્હો હોતિ.

‘‘સો તેન લક્ખણેન સમન્નાગતો સચે અગારં અજ્ઝાવસતિ, રાજા હોતિ ચક્કવત્તી…પે… રાજા સમાનો કિં લભતિ? પહૂતપુત્તો હોતિ, પરોસહસ્સં ખો પનસ્સ પુત્તા ભવન્તિ સૂરા વીરઙ્ગરૂપા પરસેનપ્પમદ્દના. રાજા સમાનો ઇદં લભતિ… બુદ્ધો સમાનો કિં લભતિ? પહૂતપુત્તો હોતિ, અનેકસહસ્સં ખો પનસ્સ પુત્તા ભવન્તિ સૂરા વીરઙ્ગરૂપા પરસેનપ્પમદ્દના. બુદ્ધો સમાનો ઇદં લભતિ’’. એતમત્થં ભગવા અવોચ.

૨૨૧. તત્થેતં વુચ્ચતિ –

‘‘પુરે પુરત્થા પુરિમાસુ જાતિસુ,

ચિરપ્પનટ્ઠે સુચિરપ્પવાસિનો;

ઞાતી સુહજ્જે સખિનો સમાનયિ,

સમઙ્ગિકત્વા અનુમોદિતા અહુ.

‘‘સો તેન [સ તેન (ક.)] કમ્મેન દિવં સમક્કમિ,

સુખઞ્ચ ખિડ્ડારતિયો ચ અન્વભિ;

તતો ચવિત્વા પુનરાગતો ઇધ,

કોસોહિતં વિન્દતિ વત્થછાદિયં.

‘‘પહૂતપુત્તો ભવતી તથાવિધો,

પરોસહસ્સઞ્ચ [પરોસહસ્સસ્સ (સી. પી.)] ભવન્તિ અત્રજા;

સૂરા ચ વીરા ચ [સૂરા ચ વીરઙ્ગરૂપા (ક.)] અમિત્તતાપના,

ગિહિસ્સ પીતિંજનના પિયંવદા.

‘‘બહૂતરા પબ્બજિતસ્સ ઇરિયતો,

ભવન્તિ પુત્તા વચનાનુસારિનો;

ગિહિસ્સ વા પબ્બજિતસ્સ વા પુન,

તં લક્ખણં જાયતિ તદત્થજોતક’’ન્તિ.

પઠમભાણવારો નિટ્ઠિતો.