૯. છત્તુપાહનવગ્ગો

૧. પઠમસિક્ખાપદવણ્ણના

૧૧૮૧. છત્તવગ્ગસ્સ પઠમસિક્ખાપદે – સકિમ્પિ ધારેતિ આપત્તિ પાચિત્તિયસ્સાતિ મગ્ગગમને એકપયોગેનેવ દિવસમ્પિ ધારેતિ, એકાવ આપત્તિ. સચે કદ્દમાદીનિ પત્વા ઉપાહના ઓમુઞ્ચિત્વા છત્તમેવ ધારેન્તી ગચ્છતિ, દુક્કટં. અથાપિ ગચ્છાદીનિ દિસ્વા છત્તં અપનામેત્વા ઉપાહનારુળ્હાવ ગચ્છતિ, દુક્કટમેવ. સચે છત્તમ્પિ અપનામેત્વા ઉપાહનાપિ ઓમુઞ્ચિત્વા પુન ધારેતિ, પુન પાચિત્તિયં. એવં પયોગગણનાય આપત્તિયો વેદિતબ્બા. સેસં ઉત્તાનમેવ. એળકલોમસમુટ્ઠાનં – કિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, કાયકમ્મં, તિચિત્તં, તિવેદનન્તિ.

પઠમસિક્ખાપદં.

૨. દુતિયસિક્ખાપદવણ્ણના

૧૧૮૪. દુતિયે – યાનેન યાયન્તીતિ એત્થાપિ ઓરોહિત્વા પુનપ્પુનં અભિરુહન્તિયા પયોગગણનાય આપત્તિયો વેદિતબ્બા. સેસં પઠમે વુત્તનયમેવાતિ.

દુતિયસિક્ખાપદં.

૩. તતિયસિક્ખાપદવણ્ણના

૧૧૯૦. તતિયે – વિપ્પકિરિયિંસૂતિ મણયો વિપ્પકિણ્ણા. ઇધાપિ ઓમુઞ્ચિત્વા ધારેન્તિયા પયોગગણનાય આપત્તિયો. સમુટ્ઠાનાદીનિ વુત્તનયાનેવ. કેવલં ઇધ અકુસલચિત્તં હોતીતિ.

તતિયસિક્ખાપદં.

૪. ચતુત્થસિક્ખાપદવણ્ણના

૧૧૯૪. ચતુત્થે – સીસૂપગાદીસુ યં યં ધારેતિ, તસ્સ તસ્સ વસેન વત્થુગણનાય આપત્તિયો વેદિતબ્બા. સેસં તતિયે વુત્તનયમેવાતિ.

ચતુત્થસિક્ખાપદં.

૫. પઞ્ચમસિક્ખાપદવણ્ણના

૧૧૯૯. પઞ્ચમે – ગન્ધવણ્ણકેનાતિ ગન્ધેન ચ વણ્ણકેન ચ. સેસં ઉત્તાનમેવ. સમુટ્ઠાનાદીનિ તતિયસદિસાનેવાતિ.

પઞ્ચમસિક્ખાપદં.

૬. છટ્ઠસિક્ખાપદવણ્ણના

૧૨૦૨. છટ્ઠે – સબ્બં પઞ્ચમે વુત્તસદિસમેવાતિ.

છટ્ઠસિક્ખાપદં.

૭. સત્તમસિક્ખાપદવણ્ણના

૧૨૦૮-૯. સત્તમે – ઉમ્મદ્દાપેતિ આપત્તિ પાચિત્તિયસ્સાતિ એત્થ હત્થં અમોચેત્વા ઉમ્મદ્દને એકાવ આપત્તિ, મોચેત્વા મોચેત્વા ઉમ્મદ્દને પયોગગણનાય આપત્તિયો. સમ્બાહનેપિ એસેવ નયો. ગિલાનાયાતિ અન્તમસો મગ્ગગમનપરિસ્સમેનાપિ સાબાધાય. આપદાસૂતિ ચોરભયાદીહિ સરીરકમ્પનાદીસુ. સેસં ઉત્તાનમેવ. સમુટ્ઠાનાદીનિ તતિયસદિસાનેવાતિ.

સત્તમસિક્ખાપદં.

૮-૯-૧૦. અટ્ઠમનવમદસમસિક્ખાપદવણ્ણના

૧૨૧૦. અટ્ઠમાદીસુ તીસુ સિક્ખમાનાય સામણેરિયા, ગિહિનિયાતિ ઇદમેવ નાનાકરણં, સેસં સત્તમે વુત્તસદિસમેવાતિ.

અટ્ઠમનવમદસમસિક્ખાપદાનિ.

૧૧. એકાદસમસિક્ખાપદવણ્ણના

૧૨૧૪. એકાદસમે – ભિક્ખુસ્સ પુરતોતિ અભિમુખમેવાતિ અત્થો. ઇદં પન ઉપચારં સન્ધાય કથિતન્તિ વેદિતબ્બં. સેસં ઉત્તાનમેવ. કથિનસમુટ્ઠાનં – કાયવાચતો કાયવાચાચિત્તતો ચ સમુટ્ઠાતિ, કિરિયાકિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, કાયકમ્મં, વચીકમ્મં, તિચિત્તં, તિવેદનન્તિ.

એકાદસમસિક્ખાપદં.

૧૨. દ્વાદસમસિક્ખાપદવણ્ણના

૧૨૧૯-૨૩. દ્વાદસમે – અનોકાસકતન્તિ અસુકસ્મિં નામ ઠાને પુચ્છામીતિ એવં અકતઓકાસં. તેનેવાહ – ‘‘અનોકાસકતન્તિ અનાપુચ્છા’’તિ. અનોદિસ્સાતિ અસુકસ્મિં નામ ઠાને પુચ્છામીતિ એવં અનિયમેત્વા કેવલં ‘‘પુચ્છિતબ્બં અત્થિ, પુચ્છામિ અય્યા’’તિ એવં વત્વા. સેસં ઉત્તાનમેવ. પદસોધમ્મસમુટ્ઠાનં – વાચતો વાચાચિત્તતો ચ સમુટ્ઠાતિ, કિરિયાકિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, વચીકમ્મં, તિચિત્તં, તિવેદનન્તિ.

દ્વાદસમસિક્ખાપદં.

૧૩. તેરસમસિક્ખાપદવણ્ણના

૧૨૨૬. તેરસમે – પરિક્ખેપં અતિક્કામેન્તિયાતિ એકેન પાદેન અતિક્કન્તે દુક્કટં, દુતિયેન પાચિત્તિયં. ઉપચારેપિ એસેવ નયો.

૧૨૨૭. અચ્છિન્નચીવરિકાયાતિઆદીસુ સઙ્કચ્ચિકચીવરમેવ ચીવરન્તિ વેદિતબ્બં. આપદાસૂતિ મહગ્ઘં હોતિ સઙ્કચ્ચિકં, પારુપિત્વા ગચ્છન્તિયાવ ઉપદ્દવો ઉપ્પજ્જતિ, એવરૂપાસુ આપદાસુ અનાપત્તિ. સેસં ઉત્તાનમેવ. એળકલોમસમુટ્ઠાનં – કિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, કાયકમ્મં, તિચિત્તં, તિવેદનન્તિ.

તેરસમસિક્ખાપદં.

છત્તુપાહનવગ્ગો નવમો.

ઉદ્દિટ્ઠા ખો અય્યાયો છસટ્ઠિસતં પાચિત્તિયા ધમ્માતિ એત્થ સબ્બાનેવ ભિક્ખુનીનં ખુદ્દકેસુ છન્નવુતિ, ભિક્ખૂનં દ્વેનવુતીતિ અટ્ઠાસીતિસતં સિક્ખાપદાનિ, તતો સકલં ભિક્ખુનીવગ્ગં, પરમ્પરભોજનં, અનતિરિત્તભોજનં, અનતિરિત્તેન અભિહટ્ઠું પવારણં, પણીતભોજનવિઞ્ઞત્તિ, અચેલકસિક્ખાપદં, દુટ્ઠુલ્લપટિચ્છાદનં, ઊનવીસતિવસ્સુપસમ્પાદનં, માતુગામેન સદ્ધિં સંવિધાય અદ્ધાનગમનં, રાજન્તેપુરપ્પવેસનં, સન્તં ભિક્ખું અનાપુચ્છા વિકાલે ગામપ્પવેસનં, નિસીદનં વસ્સિકસાટિકન્તિ ઇમાનિ દ્વાવીસતિ સિક્ખાપદાનિ અપનેત્વા સેસાનિ સતઞ્ચ છસટ્ઠિ ચ સિક્ખાપદાનિ પાતિમોક્ખુદ્દેસમગ્ગેન ઉદ્દિટ્ઠાનિ હોન્તીતિ વેદિતબ્બાનિ. તેનાહ – ‘‘ઉદ્દિટ્ઠા ખો અય્યાયો છસટ્ઠિસતં પાચિત્તિયા ધમ્મા…પે… એવમેતં ધારયામી’’તિ.

તત્રાયં સઙ્ખેપતો સમુટ્ઠાનવિનિચ્છયો – ગિરગ્ગસમજ્જં, ચિત્તાગારસિક્ખાપદં, સઙ્ઘાણિ, ઇત્થાલઙ્કારો, ગન્ધવણ્ણકો, વાસિતકપિઞ્ઞાકો, ભિક્ખુનીઆદીહિ ઉમ્મદ્દનપરિમદ્દનાનીતિ ઇમાનિ દસ સિક્ખાપદાનિ અચિત્તકાનિ લોકવજ્જાનિ. અયં પનેત્થ અધિપ્પાયો – વિનાપિ ચિત્તેન આપજ્જિતબ્બત્તા અચિત્તકાનિ, ચિત્તે પન સતિ અકુસલેનેવ આપજ્જિતબ્બત્તા લોકવજ્જાનિ. અવસેસાનિ અચિત્તકાનિ, પણ્ણત્તિવજ્જાનેવ. ચોરીવુટ્ઠાપનં, ગામન્તરં, આરામસિક્ખાપદં ગબ્ભિનિવગ્ગે આદિતો પટ્ઠાય સત્ત, કુમારિભૂતવગ્ગે આદિતો પટ્ઠાય પઞ્ચ, પુરિસસંસટ્ઠં પારિવાસિયછન્દદાનં, અનુવસ્સવુટ્ઠાપનં, એકન્તરિકવુટ્ઠાપનન્તિ ઇમાનિ એકૂનવીસતિ સિક્ખાપદાનિ સચિત્તકાનિ પણ્ણત્તિવજ્જાનિ, અવસેસાનિ સચિત્તકાનિ લોકવજ્જાનેવાતિ.

સમન્તપાસાદિકાય વિનયસંવણ્ણનાય ભિક્ખુનીવિભઙ્ગે

ખુદ્દકવણ્ણના નિટ્ઠિતા.

પાચિત્તિયકણ્ડં નિટ્ઠિતં.