૪. પહારસિક્ખાપદવણ્ણના

૪૪૯. ચતુત્થે – પહારં દેન્તીતિ ‘‘આવુસો પીઠકં પઞ્ઞપેથ, પાદધોવનં આહરથા’’તિઆદીનિ વત્વા તથા અકરોન્તાનં પહારં દેન્તિ.

૪૫૧. પહારં દેતિ આપત્તિ પાચિત્તિયસ્સાતિ એત્થ પહરિતુકામતાય પહારે દિન્ને સચેપિ મરતિ પાચિત્તિયમેવ. પહારેન હત્થો વા પાદો વા ભિજ્જતિ, સીસં વા ભિન્નં હોતિ, પાચિત્તિયમેવ. ‘‘યથાયં સઙ્ઘમજ્ઝે ન વિરોચતિ, તથા નં કરોમી’’તિ એવં વિરૂપકરણાધિપ્પાયેન કણ્ણં વા નાસં વા છિન્દતિ, દુક્કટં.

૪૫૨. અનુપસમ્પન્નસ્સાતિ ગહટ્ઠસ્સ વા પબ્બજિતસ્સ વા ઇત્થિયા વા પુરિસસ્સ વા અન્તમસો તિરચ્છાનગતસ્સાપિ પહારં દેતિ, દુક્કટં. સચે પન રત્તચિત્તો ઇત્થિં પહરતિ, સઙ્ઘાદિસેસો.

૪૫૩. કેનચિ વિહેઠિયમાનોતિ મનુસ્સેન વા તિરચ્છાનગતેન વા વિહેઠિયમાનો. મોક્ખાધિપ્પાયોતિ તતો અત્તનો મોક્ખં પત્થયમાનો. પહારં દેતીતિ કાયકાયપટિબદ્ધનિસ્સગ્ગિયાનં અઞ્ઞતરેન પહારં દેતિ, અનાપત્તિ. સચેપિ અન્તરામગ્ગે ચોરં વા પચ્ચત્થિકં વા વિહેઠેતુકામં દિસ્વા ‘‘ઉપાસક, એત્થેવ તિટ્ઠ, મા આગમી’’તિ વત્વા વચનં અનાદિયિત્વા આગચ્છન્તં ‘‘ગચ્છ રે’’તિ મુગ્ગરેન વા સત્થકેન વા પહરિત્વા યાતિ, સો ચે તેન પહારેન મરતિ, અનાપત્તિયેવ. વાળમિગેસુપિ એસેવ નયો. સેસમેત્થ ઉત્તાનમેવ. સમુટ્ઠાનાદીનિ પનસ્સ પઠમપારાજિકસદિસાનિ, ઇદં પન દુક્ખવેદનન્તિ.

પહારસિક્ખાપદં ચતુત્થં.