૫. તલસત્તિકસિક્ખાપદવણ્ણના

૪૫૪. પઞ્ચમે – તલસત્તિકં ઉગ્ગિરન્તીતિ પહારદાનાકારં દસ્સેત્વા કાયમ્પિ કાયપટિબદ્ધમ્પિ ઉચ્ચારેન્તિ. તે પહારસમુચ્ચિતા રોદન્તીતિ તે પહારપરિચિતા પુબ્બેપિ લદ્ધપહારત્તા ઇદાનિ ચ પહારં દસ્સન્તીતિ મઞ્ઞમાના રોદન્તીતિ અત્થો. ‘‘પહારસ્સ મુચ્ચિતા’’તિપિ સજ્ઝાયન્તિ, તત્થ ‘‘પહારસ્સ ભીતા’’તિ અત્થો.

૪૫૭. ઉગ્ગિરતિ આપત્તિ પાચિત્તિયસ્સાતિ એત્થ સચે ઉગ્ગિરિત્વા વિરદ્ધો પહારં દેતિ, અવસ્સં ધારેતું અસક્કોન્તસ્સ પહારો સહસા પતતિ, ન પહરિતુકામતાય દિન્નત્તા દુક્કટં. તેન પહારેન હત્થાદીસુ યંકિઞ્ચિ ભિજ્જતિ, દુક્કટમેવ.

૪૫૮. મોક્ખાધિપ્પાયો તલસત્તિકં ઉગ્ગિરતીતિ એત્થ પુબ્બે વુત્તેસુ વત્થૂસુ પુરિમનયેનેવ તલસત્તિકં ઉગ્ગિરન્તસ્સ અનાપત્તિ. સચેપિ વિરજ્ઝિત્વા પહારં દેતિ, અનાપત્તિયેવ. સેસં પુરિમસદિસમેવ સદ્ધિં સમુટ્ઠાનાદીહીતિ.

તલસત્તિકસિક્ખાપદં પઞ્ચમં.